“Ивэг түшиг” ХХК нь 2008 онд анх 20 орчим ажилчин, барилгын 2 инженертэйгээр барилга угсралтын чиглэлээр үйл ажиллагаа явуулахаар үүсгэн байгуулагдсан билээ. Үүнээс хойш Улаанбаатар хотын хөгжил цэцэглэлтэнд гар бие оролцон хувь нэмрээ оруулж олон тооны иргэний болон үйлчилгээний зориулалттай барилга байгууламжийг барьж босгожээ.
Үүнээс дурьдвал манай оронд анх шинээр нэвтэрч байсан технологи болох бүрэн цутгамал хийцлэлтэй 16 давхар “Скай тауэр” орон сууцны барилгыг 2008 онд “Дельта констракшн” ХХК-ий туслан гүйцэтгэгчээр орж бие даан гүйцэтгэсэн билээ. Тэр цагаас хойш бүрэн цутгамал, арагт бүтээц бүхий барилгуудыг сүндэрлүүлсэн баялаг түүхтэй хамт олон болж барилгын салбарт өөрийн орон зайгаа олж тогтножээ. Өнөөдөр “Ивэг түшиг” ХХК нь 16 давхар хүртэл барилга байгууламж барих тусгай зөвшөөрөлтэй, 15 инженер техникийн ажилтантай, өндөр зэрэглэлийн мэргэжилтэй 200 гаруй ажилчидтай нийгмийн өмнө хүлээсэн үүргээ нэр төртэй биелүүлдэг мэргэжлийн чадварлаг компани болж төлөвшжээ.
Тус компаниас салбарын тэргүүний ажилчин “Тэргүүний барилгачин” цол тэмдэгээр 3 хүн, “Аварга барилгачин” тэмдэгээр 6 хүн, “Тэргүүний залуу алтан медалиар” 1 хүн тус тус шагнагдаж хамт олондоо үлгэр жишээ болон алдаршсан юм.
2013 онд хүн амыг орон сууцжуулах төслийн анхны дорвитой ажил болох “Буянт –Ухаа 1” орон сууцны хорооллыг барьж босгоход гар бие оролцож 18’000м2 угсралтын ажлыг хийж гүйцэтгэсэн бөгөөд түүний үргэлжлэл болох “Буянт-Ухаа 2” хорооллын ажлыг хийж гүйцэтгэх бэлтгэл ажлыг хангаж байна.
Цаашид манай компаний мэргэжилтэй ажилчид болон материал техникийн бааз өргөжин тэлж байгаа тул барилгын мэргэжлийн шилдэг компани болж улам ихийг хийж бүтээх зорилт тавин ажиллаж байна.