Өөрчлөлтийг хадгалах уу?

Гарчиг эсвэл агуулгад хадгалаагүй өөрчлөлт байна.

ТӨВ АЙМАГТ 100 МВТ-ЫН ЧАДАЛТАЙ БАТАРЕЙ ХУРИМТЛУУРЫН СИСТЕМ БАЙГУУЛАХААР ТӨЛӨВЛӨЖ БАЙНА

Author avatar setguul@barilga.mn
2026.11.20

Улаанбаатар хотын өвлийн эрчим хүчний оргил ачааллыг бууруулах зорилгоор Төв аймгийн Сэргэлэн суманд 100 МВт чадалтай, 400 МВт.цагийн багтаамжтай батарей хуримтлуурын систем байгуулах төслийн санхүүжилт, хамтын ажиллагааны асуудлыг хэлэлцэж байна. Нийслэлийн Засаг дарга бөгөөд Улаанбаатар хотын Захирагч Б.Пүрэвдагва Дэлхийн банк группийн Монгол Улс дахь суурин төлөөлөгч Виктория Делмон тэргүүтэй төлөөлөгчидтэй уулзах үеэрээ төслийг хэрэгжүүлэх боломжийн талаар санал солилцжээ.

Төслийг Улаанбаатар хотоос зүүн урагш 50 орчим км зайд, Төв аймгийн Сэргэлэн сумын нутагт 10.2 га талбайд байгуулахаар төлөвлөсөн байна. Санхүүжилтийг улсын төсвөөс бус, төр, хувийн хэвшлийн түншлэл болон олон улсын санхүүгийн бусад хэрэгслээр шийдвэрлэх боломжийг судалж байгаа юм. Уулзалтын үеэр хотын дарга эрчим хүчний өсөн нэмэгдэж буй хэрэгцээг хангах, өвлийн оргил ачааллыг давахад сэргээгдэх эрчим хүч болон батарей хуримтлуурын төслүүд чухал болохыг онцолж, санхүүжилт, хэрэгжилтийг шуурхай шийдвэрлэхэд олон улсын байгууллагуудтай хамтран ажиллах хүсэлтэй байгаагаа илэрхийлжээ.

Батарей хуримтлуурын систем нь эрчим хүчний салбарын шинэ төрлийн инженерийн дэд бүтцийн байгууламж бөгөөд барилгын салбарт ч тодорхой хэмжээний бүтээн байгуулалт, угсралтын ажил бий болгох боломжтой.

Тухайлбал, төслийн хүрээнд тоног төхөөрөмжийн суурь, инженерийн байгууламж, цахилгаан дэд станц болон холболтын дэд бүтэц, удирдлага, хамгаалалтын системийн зураг төсөл, угсралтын ажил шаардагдана. Мөн өндөр хүчин чадлын батарейг байрлуулах орчны аюулгүй байдал, хөргөлт, галын хамгаалалт зэрэг инженерийн шийдлийг цогцоор нь төлөвлөх шаардлагатай. Төсөл хэрэгжсэнээр эрчим хүчний системийн найдвартай ажиллагааг дэмжихийн зэрэгцээ Монголын инженерийн болон барилга угсралтын компаниудад шинэ төрлийн дэд бүтцийн төсөлд оролцох боломж бүрдэх юм.

Танд ямар санагдав?

0 / 250

Сэтгэгдэл

Одоогоор сэтгэгдэл алга.

Вэб-д шинэчлэл орсон байна.