Дорнод аймаг дахь Политехник коллежийн 640 суралцагчийн суудалтай шинэ барилгын ажлыг 2027 онд эхлүүлэхээр төлөвлөжээ. Улсын төсвийн 26 тэрбум төгрөгийн хөрөнгө оруулалтаар хэрэгжүүлэх уг төслийн зураг төсөл, төсөв боловсруулах ажил одоогоор үргэлжилж байна.

Шинэ барилгыг Хэрлэн сумын IV багт коллежийн өөрийн эзэмшлийн газарт барихаар төлөвлөсөн байна. Тус коллежийн захирал Л.Хишигтогтохын мэдээлснээр, одоогоор сургуулийн үйл ажиллагаа Хэрлэн сумын IV багт байрлах хуучин Хөдөө аж ахуйн техник мэргэжлийн сургуулийн (ХААТМС) барилга болон VII багт байрлах Мэргэжлийн сургалт, үйлдвэрлэлийн төвийн (МСҮТ) байранд хуваагдан явагдаж байгаа юм.
Шинэ барилга ашиглалтад орсноор сургалтын анги танхим, тоног төхөөрөмж, багш, суралцагчдын үйл ажиллагааг нэг дор төвлөрүүлж, сургалтын орчныг сайжруулах нөхцөл бүрдэнэ.
Харин одоо ашиглаж буй 2017 онд баригдсан сургуулийн барилгыг орон нутгийн эзэмшилд шилжүүлж, ерөнхий боловсролын сургууль болон цэцэрлэгийн зориулалтаар ашиглах боломжийг судалж байгаа юм. Ингэснээр шинэ барилга нь мэргэжлийн боловсролын сургалтын орчныг сайжруулахаас гадна одоогийн барилгыг боловсролын бусад хэрэгцээнд ашиглах боломжийг бий болгох ач холбогдолтой.
Сэтгэгдэл