Өөрчлөлтийг хадгалах уу?

Гарчиг эсвэл агуулгад хадгалаагүй өөрчлөлт байна.

БАРИЛГЫН САЛБАРЫН УДИРДЛАГА, ИНЖЕНЕРҮҮДЭД ЗОРИУЛСАН МЕНЕЖМЕНТИЙН СУРГАЛТ БОЛЛОО

Author avatar setguul@barilga.mn
2026.11.17

“Барилгын сургалт хөгжлийн академи”-аас барилгын салбарын аж ахуйн нэгж, байгууллагын удирдлага, инженер техникийн ажилтнуудын хууль эрх зүй, мэргэжлийн болон менежментийн мэдлэгийг дээшлүүлэх зорилгоор барилгын менежментийн сургалтыг 2026 оны арваннэгдүгээр сарын 13-ны өдөр зохион байгууллаа.

Нэг өдрийн 8 цагийн сургалтад барилгын салбарт үйл ажиллагаа эрхэлдэг аж ахуйн нэгж, байгууллагын удирдлагууд болон инженер техникийн ажилтнууд хамрагдав.

Сургалтын хөтөлбөр зургаан үндсэн сэдвээс бүрдсэн бөгөөд дараах чиглэлүүдийг багтаалаа. Үүнд:

  • Барилгын салбарын хууль эрх зүй, дүрэм журам

  • Барилгын норм, нормативын баримт бичгийн тогтолцоо

  • Барилгын төслийн удирдлага, менежмент

  • Барилгын хөдөлмөрийн аюулгүй байдал, эрүүл ахуй (ХАБЭА)

  • Барилга байгууламж болон барилгын материалын аюулгүй байдлын техникийн зохицуулалт

  • Барилгын зах зээл, маркетинг

Сургалтын хүрээнд барилгын байгууллагын ХАБЭА-н удирдлагын тогтолцоо, барилгын үйлдвэрлэлийн хөдөлмөрийн аюулгүй байдал, эрүүл ахуйн дүрэм (БНбД 12-02-24), салбарын хууль эрх зүйн орчин, ажил олгогчийн эрх, үүрэг, барилгын төсөл болон гэрээний удирдлагын талаар дэлгэрэнгүй авч үзлээ. Түүнчлэн барилгын зах зээл, маркетингийн чиглэлээр салбарын бизнесийн орчин, байгууллагын үйл ажиллагааны төлөвлөлттэй холбоотой мэдлэг, мэдээлэл өгсөн байна.

Сургалтыг ХАБЭА, барилгын инженерчлэл, хууль эрх зүй, төслийн болон гэрээний удирдлага, маркетингийн чиглэлээр мэргэшсэн багш, салбарын туршлагатай мэргэжилтнүүд удирдан явуулж, тухайн чиглэлүүдийн онолын мэдлэг, практик хэрэглээг хослуулан хүргэлээ.

Сургалтын агуулга нь оролцогчдод хууль тогтоомж, норм нормативын шаардлагыг үйл ажиллагаандаа зөв хэрэгжүүлэх, хөдөлмөрийн аюулгүй байдлыг хангах, төсөл болон гэрээний удирдлагыг сайжруулах, зах зээлийн нөхцөлд байгууллагын үйл ажиллагааг оновчтой төлөвлөхөд шаардлагатай мэдлэг олгосноороо ач холбогдолтой юм. Эдгээр мэдлэг, ур чадвар нь үйлдвэрлэлийн эрсдэлийг бууруулах, төслийн чанар, бүтээмжийг нэмэгдүүлэх, байгууллагын удирдлага, зохион байгуулалтыг боловсронгуй болгоход чухал нөлөөтэй юм.

Сургалтад хамрагдсан оролцогчдод сертификат олгож, мэргэшсэн зэрэг горилогч инженерүүдэд сонгон суралцах нэг багц цагийн гэрчилгээ гардууллаа.

Зохион байгуулагч:

Барилгын сургалт хөгжлийн академи (БСХА)

Барилгын үндэсний ассоциаци ТББ

Монголын Барилгын Инженерүүдийн Холбоо

Barilga.mn

Танд ямар санагдав?

0 / 250

Сэтгэгдэл

Одоогоор сэтгэгдэл алга.

Вэб-д шинэчлэл орсон байна.