Өөрчлөлтийг хадгалах уу?

Гарчиг эсвэл агуулгад хадгалаагүй өөрчлөлт байна.

Улаанбаатарын инженерийн дэд бүтцийн 40 орчим хувь нь 30-аас дээш жилийн насжилттай байна

Author avatar setguul@barilga.mn
2026.11.16

Нийслэлийн Засаг даргын Тамгын газрын Хэвлэл мэдээлэл, олон нийттэй харилцах хэлтэс 2026 оны арваннэгдүгээр сарын 12-нд Улаанбаатар хотын инженерийн хангамжийн байгууллагуудын 2026–2027 оны өвөлжилтийн бэлтгэл, бэлэн байдлын талаар мэдээллээ. Тус мэдээлэлд нийслэлийн инженерийн хангамжийн үндсэн шугам сүлжээнүүдийн ихэнх нь 1970–1990 онд баригдсан бөгөөд инженерийн дэд бүтцийн 40 орчим хувь нь 30-аас дээш жилийн насжилттай байгааг онцолжээ.

Нийслэлийн Засаг дарга Б.Пүрэвдагва “Шугам сүлжээ, тоноглолын насжилтаас хамаарч дулааны шугам сүлжээ цоорох, цахилгааны кабельд гэмтэл гарч, оршин суугчдын дэд бүтэц тасалдах эрсдэлтэй нөхцөл үүссэн” хэмээн мэдэгдсэн байна. Тэрбээр инженерийн хангамжийн байгууллагуудын өвөлжилтийн бэлтгэл, бэлэн байдлыг шалгах дадлага сургуулилалт нь эрсдэлтэй үед шуурхай ажиллах чадавхыг нэмэгдүүлж, иргэдийг дэд бүтцээр тогтвортой хангахад чиглэж байгааг дурджээ.

Нийслэлийн хэмжээнд 2026–2027 оны өвөлжилтийн бэлтгэлийн хүрээнд дулаан, цахилгаан, борооны ус зайлуулах, ус хангамж, ариутгах татуургын нийт 80.2 км шугам сүлжээг шинэчилсэн байна. 

Мөн инженерийн хангамжийн долоо, гэрэлтүүлгийн ашиглалт, засвар үйлчилгээ хариуцсан 20 байгууллага өвлийн оргил ачааллын үед гарч болзошгүй осол, гэмтлийн үед ажиллах шуурхай удирдлага, зохицуулалтаа шалгах штабын дадлага сургуулилалтад оролцжээ. Харин “Улаанбаатар цахилгаан түгээх сүлжээ” ТӨХК өвөлжилтийн бэлтгэлийн хүрээнд 52 нэр төрлийн 95 багц ажил гүйцэтгэсэн байна.

Инженерийн шугам сүлжээний насжилт нь зөвхөн ашиглалтын байгууллагын асуудал бус, хотын шинэ бүтээн байгуулалт, орон сууцжуулалт, барилгын салбарын цаашдын хөгжилтэй шууд холбоотой.

Орон сууцны хороолол, сургууль, эмнэлэг, үйлдвэрлэл, үйлчилгээний барилга байгууламжийг шинээр барихад дулаан, цахилгаан, цэвэр ус, бохир ус зайлуулах дэд бүтцийн хүчин чадал, найдвартай ажиллагаа зайлшгүй шаардлагатай. Иймээс хуучирсан шугам сүлжээг үе шаттай шинэчлэх, инженерийн дэд бүтцийн хүчин чадлыг нэмэгдүүлэх нь нийслэлийн цаашдын барилгажилт, хот байгуулалтын чухал нөхцөл юм.

Танд ямар санагдав?

0 / 250

Сэтгэгдэл

Одоогоор сэтгэгдэл алга.

Вэб-д шинэчлэл орсон байна.