Улсын хэмжээнд орон сууцны захиалгын хохирогчдын асуудлаар УИХ-ын Өргөдлийн байнгын хорооны хуралдаанаар хэлэлцэж, Засгийн газарт холбогдох чиглэл өгөхөөр боллоо. Хуралдааны үеэр Хууль зүй, дотоод хэргийн сайд Г.Тэмүүлэн орон сууц захиалагчдын эрх ашгийг хамгаалах, давхар худалдаа болон залилангийн эрсдэлийг бууруулах зорилгоор Орон сууцжуулалтын тухай болон холбогдох хуулийн төслүүдийг боловсруулж байгааг мэдээллээ.
Хуулийн төсөлд барилгын ажлын гүйцэтгэл 50 хувьд хүрээгүй тохиолдолд орон сууцны захиалга авч, хөрөнгө татахыг хязгаарлах зохицуулалт тусгажээ. Мөн барилгын зөвшөөрөл, сууцны мэдээлэл, урьдчилсан тэмдэглэлийг нэгтгэсэн цахим мэдээллийн санг энэ оны арваннэгдүгээр сард нэвтрүүлэхээр төлөвлөж байгаа юм.
Улсын хэмжээнд 95 аж ахуйн нэгжийн хэрэгжүүлж буй 106 орон сууцны төсөл асуудалтай байгаагаас 37 нь барилгын зөвшөөрөлгүй эхэлсэн бол 69 төсөл зөвшөөрөлтэй ч хугацаандаа ашиглалтад ороогүй байна.
Түүнчлэн 800 гаруй төсөл зогсонги байдалд орж, 80-100 мянган иргэн шууд болон шууд бусаар хохирсон, 120 мянга гаруй захиалагчийн эрх ашиг хөндөгдөж байгаа талаар хохирогчдын төлөөлөл мэдээлсэн юм.
Орон сууц захиалгын залилантай холбоотой 86 компанид холбогдох, 2,569 иргэнийг хамарсан, нийт 206 тэрбум төгрөгийн хохирол бүхий хэргүүдийг шалгаж байна. Эдгээр хэргийн хүрээнд 102 хохирогчид 5.9 тэрбум төгрөгийн хохирлыг барагдуулж, 42.2 тэрбум төгрөгийн хөрөнгийг хамгаалалтын арга хэмжээнд хамруулжээ.
Хот байгуулалт, барилга, орон сууцжуулалтын яамны мэдээлснээр, асуудалтай 106 төслийн 27 нь орон нутагт хэрэгжиж байгаагаас долоо нь Дархан-Уул аймагт байна. Мөн 2028-2030 онд ашиглалтад оруулах боломжтой 36 мянган айлын дахин төлөвлөлтийн төслүүдийг хэрэгжүүлэхэд инженерийн дэд бүтцийн зориулалтаар 222.4 тэрбум төгрөгийн хөрөнгө оруулалт шаардлагатай бөгөөд үүнээс 90 тэрбум төгрөгийг нийслэлийн 2027 оны төсөвт тусгахаар төлөвлөжээ.
Сэтгэгдэл