Нийслэлийн Засаг даргын Тамгын газраас арваннэгдүгээр сарын 11-ний өдөр мэдээлснээр, “Чингис хаан” олон улсын нисэх буудлын орчимд байгуулахаар төлөвлөж буй Хүннү хотын суурь дэд бүтцийн бүтээн байгуулалт үргэлжилж байна. Улаанбаатар хотоос 53 км, Зуунмод хотоос 10 км зайд байрлах тус хотыг 150 мянган хүн амтай, 80 мянган ажлын байртай байхаар төлөвлөжээ.
Хүннү хотын дэд бүтцийн ажлаас 35/10 кВ-ын “Хөндий” дэд станц, 41.5 км урт мэдээлэл холбооны шилэн кабелийн сүлжээ, үерийн хамгаалалтын нэгдүгээр далан сувгийн бүтээн байгуулалт бүрэн дуусаж, улсын комисст хүлээлгэн өгсөн байна. Мөн төмөр замын бүтээн байгуулалт 100 хувьд хүрч, тээвэр эхэлсэн бөгөөд туршилтын ажил үргэлжилж байгаа юм.
Харин 110/35/10 кВ-ын “Аэросити” дэд станцын ажил 80 хувь, хоногт 2,000 шоо метр хүчин чадалтай усан сан, шугам сүлжээний ажил 85 хувь, 5 МВт-ын “Хүннү эко дулаан-2” дулааны станц 40 хувь, хоногт 3,000 шоо метр бохир ус цэвэрлэх байгууламжийн ажил 50 хувийн гүйцэтгэлтэй байна.
Хүннү хотын ерөнхий төлөвлөлтөд эдийн засгийн чөлөөт бүс, аялал жуулчлал, худалдаа үйлчилгээ, засаг захиргаа, оюутны хотхон, үйлдвэрлэл, эрдэм шинжилгээний цогцолбор болон агаарын карго бүсийг тусгажээ. Эдгээр дэд бүтцийн ажлыг хэрэгжүүлснээр Хөшигийн хөндийд шинэ хотын суурьшил, үйлдвэрлэл, худалдаа үйлчилгээ хөгжих инженерийн үндсэн нөхцөл бүрдэх юм.
Сэтгэгдэл