Хот байгуулалт, Барилга, Орон сууцжуулалтын сайдын нэрэмжит спортын таван төрөлт тэмцээн 2026 оны арваннэгдүгээр сарын 5–7-ны өдрүүдэд 10 дахь жилдээ зохион байгуулагдаж, аваргуудаа тодрууллаа. Энэ удаагийн тэмцээнд барилгын салбарын 29 байгууллагын 19 багийн 600 гаруй тамирчин оролцож, сагсан бөмбөг, волейбол, теннис, шатар, и-спортын төрлөөр ур чадвар, авхаалж самбаагаа сорин өрсөлдсөн юм.
Тэмцээний нийлбэр дүнгээр “Барилгын хөгжлийн төв” ТӨҮГ тэргүүн байр эзэлж, шилжин явах цомын эзэн боллоо. Харин “Нийслэлийн орон сууцны корпораци” ХК дэд байр, “Улаанбаатар орон сууцжуулалт” ХХК гутгаар байрт шалгарсан байна.
Энэхүү тэмцээн нь барилгын салбарын төрийн болон хувийн хэвшлийн байгууллагуудын ажилтан, албан хаагчдыг спортын нөхөрсөг өрсөлдөөнөөр нэгтгэж, байгууллага хоорондын хамтын ажиллагаа, харилцаа холбоог бэхжүүлэх ач холбогдолтой.
Мөн ажилтнуудын бие бялдрын хөгжил, эрүүл мэндийг дэмжих, багийн ажиллагаа, хамт олны уур амьсгалыг сайжруулахад чиглэдэг уламжлалт арга хэмжээ юм.
Тэмцээнийг нээж Хот байгуулалт, Барилга, Орон сууцжуулалтын сайд Э.Бат-Амгалан хэлсэн үгэндээ Монгол Улсад барилгын салбар үүсэж хөгжсөний 100 жилийн ой энэ онд тохиож байгаатай холбогдуулан олон бүтээлч ажил санаачлан хэрэгжүүлж байгааг онцолсон. Түүнчлэн ойн хүрээнд барилгын салбарын хууль, эрх зүйн орчныг шинэчлэх зорилгоор багц хуулийн төслүүдийг боловсруулж, УИХ-аар хэлэлцүүлэхэд бэлэн болоод байгааг мэдээлжээ.
Ийнхүү 10 дахь жилдээ зохион байгуулагдсан спортын тэмцээн нь барилгын салбарын 100 жилийн ойн хүрээнд ажилтан, албан хаагчдын оролцоог нэмэгдүүлж, салбарын байгууллагуудын хамтын ажиллагаа, нэгдмэл байдлыг бэхжүүлсэн арга хэмжээ боллоо.
Сэтгэгдэл