Монгол Улсын Ерөнхийлөгч У.Хүрэлсүх 2026 оны арваннэгдүгээр сарын 4-нд Сэлэнгэ аймагт ажиллах үеэрээ аймгийн төв Сүхбаатар суманд барьсан 70 МВт-ын хүчин чадалтай дулааны цахилгаан станцын үйл ажиллагаатай танилцлаа. Тус станц нь жилд 489.2 сая кВт.ц цахилгаан эрчим хүч үйлдвэрлэх бөгөөд үүний 440.2 сая кВт.ц-ыг Төвийн бүсийн эрчим хүчний нэгдсэн сүлжээнд нийлүүлэхээр төлөвлөжээ.
Хоёр блок бүхий станц нь тус бүр 35 МВт-ын хүчин чадалтай бөгөөд жилд 373 мянган Гкал дулаан түгээх боломжтой. Ингэснээр Сүхбаатар сумын дулаан хангамжийг нэмэгдүүлж, цахилгаан, дулааны өсөн нэмэгдэж буй хэрэглээг хангахын зэрэгцээ орон сууц, үйлдвэрлэл, үйлчилгээний салбарын цаашдын хөгжлийг дэмжих ач холбогдолтой юм.
Төслийн барилга угсралтын ажлыг 2024 оны тавдугаар сард эхлүүлж, үндсэн барилга байгууламж болон тоног төхөөрөмжийн угсралтыг гүйцэтгэн, 2026 оны наймдугаар сард технологийн анхны галыг асаасан байна. Станцын онцлог нь байгаль орчинд үзүүлэх сөрөг нөлөөллийг бууруулах орчин үеийн технологийн шийдлүүдийг нэвтрүүлж буй явдал юм. Мөн хорт утааг 99 хүртэл хувиар шүүх хүчин чадалтай, Монгол Улсад анх удаа ашиглаж буй карбон яндангийн технологийг нэвтрүүлж байна.
Сэлэнгэ аймгийн дулааны цахилгаан станцын төслийг “Райд Монголиа” ХХК хувийн хэвшлийн хөрөнгө оруулалтаар хэрэгжүүлжээ. Төслийн нийт өртөг 150 орчим сая ам.доллар бөгөөд төрөөс тоног төхөөрөмж, иж бүрдлийн импортын нэмэгдсэн өртгийн албан татварыг дөрвөн жилийн хугацаанд хэсэгчлэн төлөх боломж бүрдүүлж, бодлогын дэмжлэг үзүүлсэн байна.
Тус станц нь Сэлэнгэ аймгийн эрчим хүчний дэд бүтцийг өргөжүүлэхээс гадна Төвийн бүсийн нэгдсэн сүлжээнд нийлүүлэх цахилгаан эрчим хүчний хэмжээг нэмэгдүүлэх, бүс нутгийн үйлдвэрлэл, эдийн засгийн өсөлтийг дэмжих шинэ эх үүсвэр болох юм.
Сэтгэгдэл