“100 мянган айлын орон сууц” үндэсний хөтөлбөрийн зорилго, хэрэгжүүлэх бодлого, санхүүжилтийн шийдэл болон иргэдэд үзүүлэх үр дүнгийн талаар 2026 оны арваннэгдүгээр сарын 3-нд сэтгүүлчдэд мэдээлэл өгөх уулзалт зохион байгуулсан байна.
Монгол Улсын Засгийн газраас иргэдийн орон сууцны хүртээмжийг нэмэгдүүлэх, өрхийн орлогод нийцсэн орон сууцны нийлүүлэлтийг өсгөх зорилгоор тус хөтөлбөрийг 2027–2030 онд хэрэгжүүлэхээр төлөвлөж байна.
Хөтөлбөрийн хүрээнд гэр хорооллын иргэдийг орон сууцанд хамруулах, ипотекийн зээлийн санхүүжилтийг нэмэгдүүлэх, иргэдийн сарын орлого, төлбөрийн чадварт нийцсэн орон сууцны борлуулалтын төрөл, нөхцөлийг бий болгохоор зорьж байгаа юм. Мөн орон сууцанд хамрагдах иргэдийн сонгон шалгаруулалтыг ухаалаг системд суурилсан, ил тод, нээлттэй зохион байгуулахаар төлөвлөжээ.
Уг уулзалтад Ерөнхий сайд Н.Учрал, Хот байгуулалт, барилга, орон сууцжуулалтын сайд Э.Бат-Амгалан, Ерөнхий сайдын зөвлөх бөгөөд хөтөлбөрийн зохицуулагч А.Баяр, Монголбанкны дэд ерөнхийлөгч Г.Энхтайван, Нийслэлийн Засаг даргын нэгдүгээр орлогч Б.Мөнхбат болон холбогдох албаныхан оролцсон байна.
Сэтгэгдэл