“Монголын Алт” (МАК) ХХК нь 1993–2025 оны хугацаанд улс, орон нутгийн төсөвт нийт 4.8 их наяд төгрөгийн татвар, хураамж төвлөрүүлсэн талаар компаниас мэдээллээ.
Тус компани нийт 17 төрлийн татвар, хураамж төлдөг бөгөөд үүнээс 2.2 их наяд төгрөгийг аж ахуйн нэгжийн орлогын албан татвар, 1.5 их наяд төгрөгийг ашигт малтмалын нөөц ашигласны төлбөр (АМНАТ) эзэлж байна. МАК групп уул уурхай, барилгын материалын үйлдвэрлэл, эрчим хүч, хөдөө аж ахуй, агаарын тээвэр, аялал жуулчлал зэрэг долоон чиглэлд үйл ажиллагаа явуулж, 5,000 гаруй ажлын байр бий болгожээ.
МАК нь барилгын материалын салбарт нийт долоон үйлдвэр байгуулж, цемент, хөнгөн блок, цонх, агааржуулалтын бүтээгдэхүүн, бетон болон шохойн бүтээгдэхүүн зэрэг 20 гаруй нэр төрлийн бүтээгдэхүүн үйлдвэрлэж байна. Компанийн мэдээлснээр дотоодын цементийн зах зээлийн 40 гаруй хувь, хөнгөн блокын зах зээлийн 70 гаруй хувийг нийлүүлдэг байна.
Тус компанийн барилгын материалын үйлдвэрүүд ашиглалтад орсноос хойш нийт 1.87 их наяд гаруй төгрөгийн (520 гаруй сая ам.долларын) импортыг орлох бүтээгдэхүүн үйлдвэрлэжээ. Мөн энэ салбарт 1,500 гаруй ажлын байр бий болгосон бөгөөд үйлдвэрүүдийн инженер, техникийн ажилтнууд 100 хувь Монгол Улсын иргэд юм
МАК групп нь дотоодын 1,200 гаруй аж ахуйн нэгжээс худалдан авалт хийж, 100 гаруй гадаадын компанитай хамтран ажилладаг байна. Түүнчлэн нийгмийн хариуцлагын хүрээнд боловсрол, эрүүл мэнд болон бусад салбарт 30 гаруй тэрбум төгрөгийн хөрөнгө оруулалттай 100 гаруй төсөл, хөтөлбөр хэрэгжүүлжээ.
Үүнээс гадна 130 гаруй км авто зам, 160 гаруй км цахилгаан дамжуулах агаарын шугам байгуулсан байна. Тус компанийн мэдээлснээр эдгээр бүтээн байгуулалтын үр дүнд өмнө нь төвийн эрчим хүчний сүлжээнд холбогдоогүй байсан Өмнөговь аймгийн Гурвантэс, Ноён, Сэврэй, Дорноговь аймгийн Мандах, Хатанбулаг сум цахилгаан хангамжтай болсон байна.
Сэтгэгдэл