Улаанбаатар хот БНСУ-ын Пажү хоттой хамтын ажиллагаа эхлүүлж, тус хотод соёл, эдийн засаг, аялал жуулчлал, бизнесийг хослуулсан “Монгол таун” цогцолбор байгуулах төслийг хэрэгжүүлэхээр боллоо.
Нийслэлийн Аялал жуулчлалын газрын дарга Д.Батсүх БНСУ-ын Пажү хотын Олон улсын солилцоо, хамтын ажиллагааны багийн ахлагч Жин Хён Док тэргүүтэй төлөөлөгчдийг хүлээн авч уулзсан бөгөөд уулзалтаар хоёр хотын хооронд найрамдалт харилцаа тогтоох, уг бүтээн байгуулалтын төслийг хэрхэн уялдуулах талаар санал солилцсон юм.
Пажү хотын төлөөлөгчдийн танилцуулсан “Монгол таун” төсөл нь БНСУ-д ажиллаж, амьдарч буй монгол иргэдийн амьдрах орчин, нийгэм соёлын оролцоог дэмжих зорилготой юм.
Төслийн хүрээнд Монголын уламжлалт гэр түүх, соёлын үзэсгэлэн, үндэсний урлагийн тоглолтын зориулалттай талбай, барилга байгууламжуудыг цогцоор нь бүтээн байгуулахаар төлөвлөөд байна.
Энэхүү бүтээн байгуулалт нь барилгын салбарын компаниудад олон улсын төсөлд оролцох шинэ үүд хаалгыг нээж байгаагаараа онцлогтой юм. Цогцолборын зураг төсөл, архитектурын төлөвлөлтөд үндэсний хэв шинжийг шингээх шаардлагатай тул Монголын архитектор, зураг төслийн компаниуд түншлэн ажиллах боломжтой. Мөн уламжлалт хэв маяг бүхий интерьер, экстерьер засал чимэглэл, модон хийцлэл болон барилгын материалыг экспортлох зах зээл бүрдэж байна.
Түүнчлэн төслийн хүрээнд “Солонгос–Монголын бизнес түншлэлийн төв”-ийг барьж байгуулах бөгөөд энэ нь хоёр улсын аж ахуйн нэгж, тэр дундаа барилга, худалдаа, инновацын компаниудын хамтын ажиллагааг хөгжүүлэх, БНСУ-ын барилгын дэвшилтэт технологийг дотоодод нэвтрүүлэх чухал гүүр болох юм.
Улаанбаатар хотын зүгээс уг санаачилгыг бүрэн дэмжиж буйгаа илэрхийлж, төслийн төлөвлөлт, барилга угсралт, хэрэгжүүлэх үе шат болон орон нутгийн захиргааны оролцооны талаар дэлгэрэнгүй мэдээлэл авч, цаашид бүтээн байгуулалтын ажилд нягт хамтран ажиллахаа мэдэгдлээ.
Сэтгэгдэл