Улаанбаатар хотын агаарын бохирдлыг бууруулах зорилгоор нийслэлийн гэр хорооллыг орон сууцжуулах, эрчим хүчний хэмнэлттэй ногоон барилгын төслүүдийг эрчимжүүлэхээр боллоо.
Арваннэгдүгээр сарын 3-4-ний өдрүүдэд зохион байгуулагдаж буй “Өрхийн түвшинд нүүрсний хэрэглээнээс үе шаттай татгалзах арга зам” үндэсний форумын үеэр хот байгуулалт, барилга, орон сууцжуулалтын чиглэлээр хэрэгжүүлэх томоохон төлөвлөгөөнүүдийг танилцууллаа. Нийслэлийн Засаг дарга бөгөөд Улаанбаатар хотын Захирагч Б.Пүрэвдагва энэ үеэр цэвэр эрчим хүч, эрчим хүчний хэмнэлттэй орон сууц, дэд бүтцийн хүртээмжид суурилсан хөгжлийн цогц бодлого хэрэгжүүлэх шаардлагатайг онцолсон юм.
Барилга, хот байгуулалтын салбарт өрнөх онцлох төсөл, хөтөлбөрүүдээс дурдвал:
Сэлбэ, Баянхошуу, Шархад дэд төвүүдэд ногоон орон сууц барина
Гэр хорооллын бүсийг инженерийн дэд бүтэцтэй холбох ажлын хүрээнд Сэлбэ, Баянхошуу, Шархад зэрэг дэд төвүүдэд дэд бүтцийг бүрэн шийдэж, эрчим хүчний хэмнэлттэй ногоон орон сууцны хорооллуудыг барьж эхлээд байна.
Нийслэлийн 26 байршил, 83 хэсэгчилсэн талбайд 148 мянга гаруй айлын орон сууц, сургууль, цэцэрлэг, эмнэлэг бүхий цогц орчныг бий болгоно. Уг төлөвлөлтийн хүрээнд 2026-2030 онд 17 мянга гаруй айлын орон сууцыг шинээр барьж ашиглалтад оруулахаар төлөвлөжээ.
10,000 өрхийн сууцыг дулаалж, цахилгаан халаалтад шилжүүлнэ
Нийслэлийн агаарын бохирдлын 51 хувийг бүрдүүлж буй 161 мянга гаруй өрхийг цэвэр эрчим хүчний шийдэлд шилжүүлэх ажил үргэлжилж байна.
Энэ өвөл НҮБ-ын Хүүхдийн сантай хамтран гэр хорооллын 7-10 мянган өрхийн гэр, сууцны дулаалгыг сайжруулж, эрчим хүчний хэмнэлттэй, дулаан хуримтлуур бүхий цахилгаан халаалтын иж бүрэн шийдэлд шилжүүлж, янданг буулгана. Энэ нь барилгын дулаалгын материал үйлдвэрлэгчид болон эрчим хүчний хэмнэлттэй халаалтын шийдэл нийлүүлэгчдийн хувьд томоохон зах зээл, хамтын ажиллагааны боломж болж байгаа юм.
Инженерийн дэд бүтэц ба Сэргээгдэх эрчим хүч
Одоогийн байдлаар 5000 өрхийг хийн түлш, 408 өрхийг нарны эрчим хүчинд холбож, 31 уурын зуухыг цахилгаан халаалтад шилжүүлээд байна. Цаашид НҮБ-ын Хөгжлийн хөтөлбөртэй хамтран гэр хорооллын өрхүүдэд нийт 2.4 МВт хүчин чадалтай батарей хуримтлуулах системтэй хосолсон нарны цахилгаан станц байгуулахаар төлөвлөжээ. Мөн цахилгаан автомашины хэрэглээг дэмжиж, цэнэглэх 80 ногоон өртөөг нийслэлд байгуулах юм байна.
Барилгын салбарынханд: Төрөөс хэрэгжүүлж буй эдгээр төслүүд нь барилгын салбарын компаниудад ногоон барилга, эрчим хүчний хэмнэлттэй технологи, дулаалгын дэвшилтэт материал, дэд бүтцийн бүтээн байгуулалтын чиглэлээр үйл ажиллагаагаа өргөжүүлэх, тендер болон төслүүдэд идэвхтэй оролцох өргөн боломжийг нээж байна.
Сэтгэгдэл