Улаанбаатар хотын баруун бүсийн дулаан хангамжийг нэмэгдүүлэх зорилготой Дулааны тавдугаар цахилгаан станцын төслийн нийт гүйцэтгэл 44 хувь, барилга угсралтын ажил 35 хувьд хүрээд байна. Энэ талаар Нийслэлийн Засаг даргын Тамгын газар 2026 оны арваннэгдүгээр сарын 2-нд мэдээллээ.
Одоогоор зуух, турбин, яндан болон бусад үндсэн байгууламжийн суурийн ажил дууссан бол захиргааны болон туслах барилгуудын суурийн ажил үргэлжилж байна. Төслийн талбайд 420 гаруй ажилтан, инженер техникийн ажилтан, 70 орчим машин механизм ажиллаж байгаа юм.
Төслийн ерөнхий инженер Г.Өлзийбаатарын мэдээлснээр барилга угсралтын ажил батлагдсан графикийн дагуу үргэлжилж байгаа бөгөөд 2026 онд үндсэн барилгын суурийн ажлыг дуусгах юм.
Тус станцыг 2028 онд бүрэн ашиглалтад оруулахаар төлөвлөж байгаа бөгөөд ашиглалтад орсноор 300 МВт-ын суурилагдсан хүчин чадалтай цахилгаан үйлдвэрлэхээс 270 МВт-ыг эрчим хүчний нэгдсэн сүлжээнд нийлүүлнэ. Мөн Баянгол, Сонгинохайрхан дүүргийн айл өрх, аж ахуйн нэгжүүдийн дулаан хангамжийн найдвартай байдлыг нэмэгдүүлэх ач холбогдолтой.
Сэтгэгдэл