Азийн Барилгын Инженерүүдийн Зохицуулах Зөвлөлийн Гүйцэтгэх Хорооны 51 дүгээр хурал болон Тайваний Барилгын Инженерүүдийн Холбооны 2026 оны олон улсын хурал 2026 оны 10 дугаар сарын 27–30-ны өдрүүдэд Тайвань улсын Тайнань хотод амжилттай үргэлжилж байна.
Тус олон улсын арга хэмжээнд Монголын Барилгын Инженерүүдийн Холбоог төлөөлөн Дэд ерөнхийлөгч А.Ичинхорлоо, Гадаад харилцааны хорооны дарга К.Мурат, Удирдах зөвлөлийн гишүүн Н.Эрдэнэсүрэн болон гишүүн байгууллага “Өлзий Иш” Хязгаарлагдмал Хариуцлагатай Компанийн инженер М.Уранбилэг нар оролцож байгаа юм.
Арга хэмжээний хүрээнд 10 дугаар сарын 27-ны өдөр Азийн Барилгын Инженерүүдийн Зохицуулах Зөвлөлийн гишүүн байгууллагуудын төлөөлөгчдийн хурал, Гүйцэтгэх Хорооны гишүүдийн уулзалт болон Түнш байгууллагуудын хурал болж, оролцогчид хамтын ажиллагааны асуудлаар санал солилцов. Мөн залуу инженерүүдийн оролцоог дэмжих зорилготой “Ирээдүйн манлайлагчдын форум” болон орон нутгийн залуу инженерүүдийн үйл ажиллагаа зохион байгуулагдлаа. Харин 10 дугаар сарын 28-ны өдөр Азийн Барилгын Инженерүүдийн Зохицуулах Зөвлөлийн Гүйцэтгэх Хорооны 51 дүгээр хурал болж, гишүүн байгууллагуудын төлөөлөгчид бүс нутгийн барилгын инженерчлэлийн салбарын хамтын ажиллагаа, цаашдын үйл ажиллагааны талаар хэлэлцсэн бол 10 дугаар сарын 29-ний өдөр Тайваний Барилгын Инженерүүдийн Холбооны 2026 оны олон улсын форум зохион байгуулагдаж, дараах тулгамдсан сэдвүүдээр үндсэн илтгэлүүд болон техникийн салбар хуралдаанууд өрнөлөө:
-
Тогтвортой дэд бүтэц, барилга байгууламжийн ашиглалт, засвар үйлчилгээ
-
Газар хөдлөлтийн эрсдэлийг бууруулах
-
Уур амьсгалын өөрчлөлтөд тэсвэртэй дэд бүтэц
-
Дижитал шилжилт ба хиймэл оюун ухаан
-
Сэргээгдэх эрчим хүч
Монгол Улс 2027 оны Азийн Барилгын Инженерүүдийн Зохицуулах Зөвлөлийн 53 дугаар хурлыг зохион байгуулна
Энэхүү арга хэмжээний үеэрх хамгийн онцлох үйл явдал нь 2027 онд болох Азийн Барилгын Инженерүүдийн Зохицуулах Зөвлөлийн Гүйцэтгэх Хорооны 53 дугаар хурлыг зохион байгуулах эрхийн төлөөх сонгон шалгаруулалт байв. Уг шалгаруулалтад Монголын Барилгын Инженерүүдийн Холбооны Гадаад харилцааны хорооны дарга К.Мурат холбооны нэрийн өмнөөс амжилттай танилцуулга хийж, бусад гишүүн орнуудтай өрсөлдөн ялалт байгуулснаар тус хурлыг эх орондоо зохион байгуулах эрхийг албан ёсоор авлаа.
Ингэснээр Азийн Барилгын Инженерүүдийн Зохицуулах Зөвлөлийн Гүйцэтгэх Хорооны хурлыг гурав дахь удаагаа Монгол Улсад зохион байгуулах боломж бүрдэж байна. Энэ нь Монголын барилгын инженерчлэлийн салбарын олон улсын хамтын ажиллагааг өргөжүүлэх, үндэсний инженерүүдийнхээ мэдлэг, туршлагыг бүс нутгийн хэмжээнд таниулан сурталчлах чухал ач холбогдолтой үйл явдал боллоо.
Сэтгэгдэл