Монгол Улсын Ерөнхийлөгч У.Хүрэлсүхийн Бүгд Найрамдах Беларусь Улсад хийж буй төрийн айлчлалын хүрээнд 2026 оны 10 дугаар сарын 26-ны өдөр Минск хотноо “Беларусь-Монголын бизнес форум” амжилттай зохион байгуулагдлаа.
Тус форумд хоёр улсын худалдаа, аж үйлдвэр, хөдөө аж ахуй, тээвэр логистик болон хөнгөн үйлдвэрлэлийн салбарын бизнес эрхлэгчид оролцож, нийт 170 орчим тэрбум төгрөг буюу 50 сая ам.долларын үнийн дүн бүхий 17 гэрээ, санамж бичиг байгууллаа. Үүний дотор Монголын барилга, бүтээн байгуулалтын салбарын аж ахуйн нэгжүүд Европын стандартын шаардлага хангасан техник технологи, материал ханган нийлүүлэгчидтэй зуучлагчгүйгээр шууд түншлэл тогтоосон томоохон хэлэлцээрүүд багтсан байна.
Форумын үр дүнд Монгол Улсын Барилгачдын нэгдсэн холбоо Беларусийн Барилгачдын холбоотой “Харилцан ойлголцлын санамж бичиг” байгуулсан нь хоёр орны барилгын салбарын бодлого төлөвлөлт, инженер техникийн ажилчдын туршлага солилцох, хамтарсан төсөл хэрэгжүүлэх өргөн боломжийг нээж байна.
Мөн барилгын материал, дотоодын цонх хаалганы үйлдвэрлэлээр тэргүүлэгч “Шинэ цонх стандарт” ХХК нь Беларусийн “Лидерстрой град” ХХК-тай хамтран ажиллах санамж бичиг үзэглэсэн нь Монголын зах зээлд чанартай материал, дэвшилтэт технологи нэвтрүүлэх чухал алхам боллоо.
Түүнчлэн барилга, угсралтын ажлын салшгүй хэсэг болох эрчим хүчний тоног төхөөрөмж, кабель утасны нийлүүлэлтийн чиглэлээр Монголын “Jessica Energy” ХХК Беларусийн “Энергокомплект” ХХК-тай түншлэлийн гэрээ байгуулжээ. Үүний зэрэгцээ газар шороо, барилгын ажилд шаардлагатай хүнд оврын машин механизмын нийлүүлэлтээр дэлхийд танигдсан "Амкодор" компанитай Монголын "Агдилер" ХХК дилерийн гэрээ байгуулсан бол, төмөр замын тээвэр логистикийн чиглэлээр "Талын хишиг транс" ХХК "Могилёвын вагон үйлдвэрлэлийн үйлдвэр"-тэй худалдааны гэрээг тус тус байгуулаад байна.
Энэхүү форум нь манай улсын аж ахуйн нэгжүүд шинэ түншлэл бий болгох, худалдаа, хөрөнгө оруулалт болон барилга, аж үйлдвэрийн салбарын хамтын ажиллагааг гүнзгийрүүлэхэд өндөр ач холбогдолтой үйл явдал болсныг албаныхан онцолж байна.
Сэтгэгдэл