Эмээлтийн 24 МВт-ын дулааны цахилгаан станцын ажил үргэлжилж байна

“Эмээлт эко аж үйлдвэрийн парк” нь нийт 539 га талбайд арьс шир, ноос, ноолуур, мах боловсруулах үйлдвэр болон хүнсний агуулахыг цогцоор нь хөгжүүлэх төсөл юм. Тус парк жилд 7.5 сая ширхэг арьс шир, 25.5 мянган тонн мах, 3.0 мянган тонн ноолуур, 5.8 мянган тонн ноос болон бусад түүхий эд боловсруулах хүчин чадалтай байхаар төлөвлөгджээ.

Паркийн инженерийн дэд бүтцийг цогцоор нь байгуулснаар малын гаралтай түүхий эдийг дотооддоо бүрэн боловсруулж, нэмүү өртөг шингэсэн бүтээгдэхүүн үйлдвэрлэх, боловсруулах үйлдвэрлэлийн кластер хөгжүүлэх суурь бүрдэнэ.

Энэ хүрээнд паркийн дэд бүтцийн чухал бүрэлдэхүүн болох 24 МВт-ын дулааны цахилгаан станцын зуух, турбин генераторын барилга, оффисын барилга болон яндангийн суурийн барилга угсралтын ажил үргэлжилж байна.

“Эмээлт эко аж үйлдвэрийн парк”-ийн Ерөнхий инженер Т.Батдондогийн мэдээлснээр, одоогоор дулааны цахилгаан станцын зуух, турбины туслах тоноглолын аяган суурийн бетон цутгалт, хэв хашмал, босоо баганан суурийн арматур, зуухны яндангийн суурийн арматур болон оффисын барилгын суурийн хөрс нягтруулалтын ажлыг гүйцэтгэж байна. Барилга байгууламжуудын суурийн ажлыг 2026 оны аравдугаар сарын эцэс гэхэд дуусгахаар төлөвлөжээ. Барилгын ажлын техникийн хяналтыг Эрчим хүчний үндэсний төв болон паркийн инженер техникийн албаны ажилтнууд хэрэгжүүлж байна.

Паркийн нутаг дэвсгэрт хамгаалалтын бүсийн хашаа барих, бизнес инкубатор болон сургалтын төв байгуулах ажлыг хийж, үйлдвэрлэл эрхлэгчдийг хүлээн авах суурь нөхцөлийг бүрдүүлсэн байна. Цаашид цахилгаан, ус хангамж, цэвэрлэх байгууламж, авто зам, инженерийн шугам сүлжээ зэрэг үндсэн дэд бүтцийг цогцоор нь шийдвэрлэж, үйлдвэрлэлийн нэгжүүдийг үе шаттайгаар төвлөрүүлэх юм.

Төсөл хэрэгжсэнээр Хан-Уул дүүргийн 20 дугаар хороонд байрлах арьс ширний үйлдвэрүүдийг Эмээлт рүү нүүлгэн шилжүүлэх, үйлдвэрлэлийн төвлөрлийг бий болгох, түүхий эдийн хаягдалгүй боловсруулалтыг нэмэгдүүлэх боломж бүрдэнэ. Мөн 5,600 гаруй тогтвортой ажлын байр бий болгохоор тооцоолсон нь бүс нутгийн эдийн засаг, боловсруулах үйлдвэрлэлийн хөгжилд чухал нөлөө үзүүлэх юм.