Төрийн орон сууцны корпораци (ТОСК) болон Төрийн банк хамтран иргэдийг орлогод нь нийцсэн орон сууцаар хангах, орон сууцны санхүүжилтийн хүртээмжийг нэмэгдүүлэх чиглэлээр хамтран ажиллах санамж бичиг байгууллаа.
Хамтын ажиллагааны хүрээнд орон сууцны төсөл, хөтөлбөрт хамрагдсан иргэдийн түрээс болон хэрэглээний төлбөрийг банкны бүтээгдэхүүн, үйлчилгээ, төлбөрийн сувгаар дамжуулан хялбар, шуурхай төлөх боломж бүрдүүлэх юм.
Мөн ТОСК-ийн орон сууцны төсөл, хөтөлбөрийг банкны санхүүгийн бүтээгдэхүүнтэй уялдуулж, иргэдийн орон сууц худалдан авах болон санхүүжилт авах боломжийг нэмэгдүүлэх хувилбаруудыг судална. Ингэснээр орон сууцны нийлүүлэлтээс гадна иргэдийн худалдан авах чадвар, санхүүжилтийн боломжийг харгалзсан шийдэл боловсруулахад чиглэж байна.
Түүнчлэн гэр хорооллын дахин төлөвлөлт, эрчим хүчний хэмнэлттэй орон сууцны хөгжлийг дэмжих, агаар болон хөрсний бохирдлыг бууруулах чиглэлээр хамтран ажиллахаар тусгажээ. Энэхүү хамтын ажиллагаа нь орон сууцны санхүүжилтийн үйлчилгээг хялбаршуулахын зэрэгцээ иргэдийн орон сууцны хэрэгцээг хангах, ногоон хөгжилд чиглэсэн төсөл, хөтөлбөрүүдийг дэмжих ач холбогдолтой юм.
Сэтгэгдэл