“Рио Тинто Монгол” компани 2022 оноос хэрэгжүүлсэн “Паркаа хамтдаа бүтээе” төслийн хүрээнд байгуулсан “Улаанбаатар парк”-ийн менежментийг нийслэлийн захиргаанд шилжүүллээ.
Тус парк 2024 оны зун нээлтээ хийсэн бөгөөд төлөвлөлтийг иргэдийн 10 мянга орчим санал, хүсэлтэд үндэслэн боловсруулжээ. Үүнд иргэд амрах, алхах, дасгал хөдөлгөөн хийх талбайгаас гадна хүүхдэд зориулсан автомашингүй орчин, тэжээвэр амьтантай салхилах хэсэг, скейтбоардын талбай зэрэг нийтийн хэрэгцээнд зориулсан орон зайн шийдлүүдийг тусгасан юм.
Парк ашиглалтад орсноос хойш “Рио Тинто Монгол” компани ногоон байгууламжийн арчилгаа, усалгаа, тохижилт, өдөр тутмын цэвэрлэгээ, харуул хамгаалалт болон олон нийтийн үйл ажиллагааг хариуцан ажиллажээ.
2026 оны 10 дугаар сарын 6-нд болсон “Улаанбаатарын үдэш” арга хэмжээний үеэр паркийн менежментийг Улаанбаатар хотын захиргаанд хүлээлгэн өгсөн байна. ,
Ингэснээр 2022 онд эхэлсэн “Паркаа хамтдаа бүтээе” санаачилга бүтээн байгуулалтын үе шатаас ашиглалт, менежментийн шатанд шилжиж, паркын өдөр тутмын арчилгаа, засвар үйлчилгээ болон цаашдын тохижилтыг нийслэл хариуцан зохион байгуулах юм.
Сэтгэгдэл