Улаанбаатар хотын Хөшигийн хөндийд байрлах “Чингис хаан” олон улсын нисэх буудлыг өргөтгөх төслийг Япон Улсын Засгийн газрын хөнгөлөлттэй зээлээр хэрэгжүүлэхээр болж, Монгол Улсын Засгийн газар болон Японы Олон улсын хамтын ажиллагааны байгууллага (ЖАЙКА) зээлийн гэрээг 9 дүгээр сарын 29-нд байгууллаа. Зээлийн хэмжээ 158.284 тэрбум иен бөгөөд жилийн 1.1 хувийн хүүтэй, 40 жилийн хугацаатай, эхний 10 жилд үндсэн төлбөрөөс чөлөөлөгдөх нөхцөлтэй юм.
Өргөтгөлийн хүрээнд шинэ зорчигчийн терминал, онгоцны явгалах зам, зогсоолын талбай, автомашины зогсоол, нэвтрэх зам болон инженерийн шугам сүлжээний дэд бүтцийг шинээр байгуулна. Мөн шинэ ачаа тээврийн терминалыг Монгол Улсын санхүүжилтээр барьж, одоо ашиглаж буй ачаа тээврийн терминалыг буулгаж, шилжүүлэхээр төлөвлөжээ.
Өргөтгөлийн төслийн хүрээнд “Чингис хаан” олон улсын нисэх буудлын жилд хүлээн авах зорчигчийн хүчин чадлыг одоогийн 1.6 саяас 5.2 саяд хүргэж, өсөн нэмэгдэж буй зорчигч, агаарын ачаа тээврийн эрэлтийг хангахын зэрэгцээ нисэх буудлын ачааллыг бууруулж, олон улсын тээврийн холболтыг сайжруулах юм.
Төслийн шинэ байгууламжуудыг 2033 оны арванхоёрдугаар сард ашиглалтад оруулахаар төлөвлөжээ.
Сэтгэгдэл