Малайзын угсармал дата төвийн технологийн компани BrightRay Макаогийн Колоан хотхонд хиймэл оюун ухаанд зориулсан 40 МВт хүртэлх хүчин чадалтай дата төв байгуулахаар төлөвлөжээ. Тус компани төслийн үл нэрлэгдсэн захиалагчтай угсармал модулийн нийлүүлэлтийн хүрээний гэрээ байгуулснаа 2026 оны есдүгээр сарын 25-нд зарласан юм
Таван давхар барилга нь нийт 9,000 м.кв талбайтай бөгөөд 40 МВт хүртэлх IT хүчин чадалтай байхаар төлөвлөжээ.
Барилгыг 2027 оны III улиралд ашиглалтад оруулахаар тооцож байгаа бөгөөд Tier III түвшний дата төвийн шаардлагад нийцүүлэхээр төлөвлөсөн байна. Мөн агаарын хөргөлт, бүрэн шингэн хөргөлт болон хосолсон агаар-шингэний хөргөлтийн системийг ашиглах боломжтой бөгөөд нэг rack-д 10–500 кВт хүртэлх хүчин чадлыг дэмжихээр төлөвлөжээ.
BrightRay-ийн үүсгэн байгуулагч Бин Ван Макаогийн газар нутгийн хязгаарлагдмал нөхцөлд газрын ашиглалтыг илүү үр ашигтай төлөвлөж, барилгын ажлын зохион байгуулалтыг оновчтой хийх шаардлагатайг онцолсон байна. Харин хиймэл оюун ухааны хэрэглээ эрчимтэй нэмэгдэхийн хэрээр өндөр хүчин чадлын тооцоолол, эрчим хүч, хөргөлтийн дэд бүтцийн хэрэгцээ өсөж, дэлхийн олон оронд AI-д зориулсан дата төвийн шинэ төслүүд олноор хэрэгжиж байна.
Иймээс тус төсөлд бүрэн угсармал дата төвийн шийдлийг ашиглахаар төлөвлөжээ. Компанийн мэдээлснээр Малайзын Жохор мужид хэрэгжүүлсэн өмнөх дата төв нь 70 МВт-ын хүчин чадлаар ажиллаж байгаа бөгөөд цаашид нэмэлт 50 МВт-ын хүчин чадал бий болгохоор төлөвлөж байна. Харин Макаогийн төслийн одоогийн хүрээний гэрээ нь модулийг заавал худалдан авах, нийлүүлэх эцсийн үүрэг хүлээлгээгүй бөгөөд төслийн түрээслэгч тодорхой болсны дараа эцсийн борлуулалтын гэрээг байгуулахаар тусгажээ.
Сэтгэгдэл