Азийн хөгжлийн банк болон Нийслэлийн Засаг даргын Тамгын газрын хамтран хэрэгжүүлж буй Улаанбаатар хотын гэр хорооллыг хөгжүүлэх, хөрөнгө оруулалтыг дэмжих хөтөлбөрийн хүрээнд баригдаж буй Сэлбэ дэд төв болон Дамбадаржаа орчмын 5000 өрхийг дулаанаар хангах 63 МВт-ын Дамбадаржаа дулааны станцын барилга угсралтын ажил 70 хувийн гүйцэтгэлтэй үргэлжилж байна.
Станцын эхний туршилт, тохируулгын ажлыг энэ оны арванхоёрдугаар сарын сүүлчээр хийж дуусгахаар төлөвлөжээ.
Мөн Дамбадаржаа дулааны станц ашиглалтад орсноор нийслэлийн дулаан хангамжийн суурь хүчин чадал нэмэгдэж, өвлийн улирлын оргил ачааллын үед үүсдэг дулааны хэрэглээний хязгаарлалтыг бууруулахад ач холбогдолтой. Энэ нь орон сууц, гэр хорооллын дахин төлөвлөлт болон шинэ суурьшлын бүсүүдийн дулаан хангамжийг нэмэгдүүлэхэд чухал дэмжлэг болох юм.
Өнөөдрийн байдлаар станцын гурван зуухны үндсэн барилга, тоног төхөөрөмж, металл хийц, нүүрсний агуулах, туузан дамжуулга, уутат шүүлтүүр, яндан болон бусад туслах байгууламжийн угсралтын ажил үргэлжилж байна.
Тус станцын бүтээн байгуулалт дууссанаар Сэлбэ дэд төвийн хөгжлийг дэмжих дулааны эх үүсвэр бий болж, цаашдын орон сууц, үйлчилгээний барилга байгууламжийн өсөн нэмэгдэх дулааны хэрэгцээг хангах боломж нэмэгдэх юм.
Сэтгэгдэл