Монгол Улсын Засгийн газар 2025 оны арванхоёрдугаар сарын 17-ны өдөр 211 дүгээр тогтоол гаргаж, барилга байгууламжийн зураг төсөл боловсруулах, магадлал хийх дүрмийг шинэчлэн баталлаа.
Уг тогтоол нь Барилгын тухай хуулийн 32 дугаар зүйлийн 32.1.8 дахь заалтыг үндэслэн батлагдсан бөгөөд барилга байгууламжийн зураг төсөл боловсруулах, түүнийг хянан магадлах үйл ажиллагааг илүү тодорхой, нэгдсэн зохицуулалттай болгоход чиглэж байна.
Шинэчилсэн дүрмээр барилга байгууламжийн зураг төсөл боловсруулах бэлтгэл ажил, инженерийн хайгуул судалгаа, зураг төслийн үе шат, бүрдэл баримт бичгийн шаардлагыг тодорхой болгосон байна. Мөн барилгын төвөгшлийн ангилалд нийцүүлэн зураг төслийн ажлыг төлөвлөх, боловсруулах, магадлал хийх үйл ажиллагааг зохицуулах зохицуулалтыг тусгажээ.
Түүнчлэн зураг төсөл боловсруулах болон магадлал хийх үйл явцад оролцогч захиалагч, зураг төсөл зохиогч, зөвлөх болон магадлалын байгууллагын эрх, үүрэг, хариуцлагыг тодорхой болгож, зураг төслийн чанар, аюулгүй байдал, барилгын норм, стандартын хэрэгжилтийг хангах нөхцөлийг бүрдүүлэхээр тусгасан байна.
Энэхүү шинэчилсэн дүрэм батлагдсанаар барилгын салбар дахь зураг төслийн үйл ажиллагаанд тавих хяналт сайжирч, хүнд суртлыг бууруулах, зураг төсөл боловсруулах болон магадлал хийх үйл явцыг илүү шуурхай, үр ашигтай болгох ач холбогдолтой гэж үзэж байна.
Шинэчилсэн дүрмийн хэрэгжилтэд хяналт тавьж ажиллахыг Хот байгуулалт, барилга, орон сууцжуулалтын сайд Э.Бат-Амгаланд үүрэг болгосон бөгөөд тогтоолыг 2026 оны гуравдугаар сарын 16-ны өдрөөс эхлэн дагаж мөрдөгдөж эхэллээ.
Сэтгэгдэл