Нью-Йоркийн Манхэттений “Billionaires’ Row” буюу тэрбумтнуудын гудамжинд байрлах 432 Park Avenue тансаг орон сууцны оршин суугчид, барилгын эзэд болох CIM Group болон Macklowe Properties компанийн эсрэг шүүхэд гомдол гаргажээ. Оршин суугчдын зөвлөл 2021 онд, барилгын эзэд болон хөгжүүлэгчдийг шүүхэд өгч байсан бөгөөд 2025 оны 4-р сард дахин шинэ гомдол гаргасан байна.
Тэд барилгын фасадын хагарлыг нуусан, аюулгүй байдлыг зөрчсөн, мөн худалдан авагчдыг төөрөгдүүлсэн гэж үзэж байна. Мөн оршин суугчид шүүхэд гаргасан гомдолдоо барилгын фасадын хагарал, ус нэвтрэлт, лифт ажиллахгүй байх, чимээ шуугиан зэрэг олон асуудлуудыг дурьджээ.
Анх 2016 онд барилгын зөвлөх инженерийн хийсэн шинжилгээнд 1,893 хагаралтай гэж тэмдэглэгдсэн бөгөөд эдгээр хагарал нь ус нэвтрэлт, төмөр бетоны зэврэлт зэрэг асуудлуудыг үүсгэж, барилгын аюулгүй байдалд нөлөөлж болзошгүй гэж дүгнэлт гарч байжээ.
Оршин суугчдын зөвлөл барилгын засвар, нэр хүндийн хохирол, үл хөдлөх хөрөнгийн үнэ буурах зэрэгт нийтдээ 165 сая ам.долларын нөхөн төлбөр шаардаж байгаа аж.
Энэхүү хэрэг нь орон сууцны барилгын чанар, аюулгүй байдал, худалдан авагчдын эрхийн асуудлыг дахин хөндөж байна.
Сэтгэгдэл