Иргэд нийтийн тээврээр 1000 төгрөг төлж зорчих туршилтыг өчигдөр /2025.01.20/эхлүүллээ. Улаанбаатар хотод өдөрт 1100 орчим автобус үйлчилгээнд явж байгаа бөгөөд эдгээр автобуснуудад зорчих тоог тооцоолох төлбөрийн системийг суурилуулан туршиж, ирэх “хоёрдугаар сарын 1-ээс автобусанд 1000 төгрөг төлж зорчиж эхэлнэ”  гэж Нийтийн тээврийн газрын дарга Д.Отгонжаргал мэдэгдлээ.

Нийслэлийн тээврийн газраас мэдээлснээр зорчигчид 1000 төгрөгийн төлбөр төлж өдөртөө дөрвөн удаа үнэгүй зорчих эрхтэй болох бөгөөд үүнд хугацаа хамаарахгүй юм байна. Харин өдөрт дөрвөөс дээш удаа зорчих тохиолдолд ахин 1000 төгрөг нэмж төлөхөөр болж байна. Оюутнуудын хувьд ч гэсэн 1000 төгрөг төлж автобусаар зорчих бол хүүхдүүд болон ахмад настан, хөгжлийн бэрхшээлтэй иргэд харьяалал харгалзахгүй автобусаар үнэгүй зорчдогийг хэвээр үлдээсэн гэдгийг хэллээ