Зөвшөөрөлгүй зам талбай, ногоон байгууламж ухаж буй мэдээллийг хүлээн авч байна

Дулааны улиралд хийгддэг бүтээн байгуулалт, засварын ажилтай холбоотойгоор нийтийн эзэмшлийн зам талбай, тохижилт, ногоон байгууламжийг зөвшөөрөлгүйгээр ухаж, дураараа эвдэж сүйтгэж, иргэдийн ая тухтай амьдрах нөхцөлийг алдагдуулан, бухимдал үүсгэх тохиолдолууд гарсаар байна. 

Иймд таны ажиллаж амьдарч байгаа орчинд зам талбай сэтлэх, сүвлэх зөвшөөрөлтэй эсэх тэмдэг тэмдэглээг байрлуулахгүйгээр нийтийн эзэзмшлийн зам талбай, тохижилт, ногоон байгууламжийг зөвшөөрөлгүй ухаж байгаа бол шалгуулах, хариуцлага тооцуулах, зөрчлийн тухай мэдээллийг Улаанбаатар хотын Захирагчийн ажлын албаны Хотын инженерийн байгууламжийн хэлтсийн 11-315429, Нийслэлийн Замын хөгжлийн газрын 11-323662 дугаар утсанд болон Тээврийн цагдаагийн алба зэрэг мэргэжлийн байгууллагууд, харьяалах Хороо, СӨХ-д мэдэгдэн хамтран ажиллахыг  хүсье.

Нийслэлийн Засаг даргын захирамжаар байгуулагдсан ажлын хэсэг нь долоо хоног бүр “Авто зам, тохижилт, ногоон байгууламжийг ашиглах, хамгаалах журам”-ын дагуу нийслэлийн нутаг дэвсгэрт авто зам, тохижилт, ногоон байгууламжийг сэтлэх, сүвлэж инженерийн шугам сүлжээ хийх, орц гарц гаргах үйл ажиллагаа явуулах иргэн, аж ахуйн нэгжээс ирүүлсэн хүсэлтийг хэлэлцэж зөвшөөрөл олгодог. 

Хэрэв зөвшөөрөлгүйгээр нийтийн эзэмшлийн зам талбайг ухаж сүйтгэвэл техник, машин механизмыг журамлан, Зөрчлийн тухай хуулийн дагуу арга хэмжээг авдаг байна.