"Монгол уран бүтээлч" булангаараа Монголынхоо шилдэг архитекторуудын биежсэн бүтээлүүдийг цувралаар танилцуулж байгаа билээ. Өмнөх дугаарт архитектор Э.Дөлгөөний бүтээл болох Монголын анхны 9 метр урт консол "Highland" паркийг танилцуулсан. Тэгвэл энэ удаагийн дугаарт 2020 оны шилдэг барилгаар шалгараад байгаа "Asa land" - ын онцоллоо. 2018-2020 онд ашиглалтад орсон уг барилга нь 26,0 га газарт баригдсан байна. Монголчуудын аян дайнд явахдаа эсвэл нэг газар удаан хугацаагаар суурин буудаллахдаа гэрээ хүрээ хэлбэрээр байрлуулж барьдаг уламжлалыг ерөнхий төлөвлөгөөндөө ашигласан байна.
Энэхүү гэр маягын сууц, рестораны хэсгийг хуучны монгол гэрийн загварыг орчин үеийн хэв загварт оруулж, жуулчдын эрэлт хэрэгцээ шаардлагыг хангасан орчин үеийн барилга, байгалийн үзэсгэлэнг хослуулсан цогцолбор юм. Гэрүүдийн харууцыг бие биенээ халхлахгүйгээр төвшинг өндөр нам хийж үйлчилгээг жигд хүртээмжтэй болгохын тулд их гэрийг тойрсон хэлбэрээр төлөвлөж өгсөн.
Гэрийг 3 талаас нь онгойлгож, дээврийн гэрэлтүүлгийг ашигласан нь байгалийн гэрлийг барилгын дотор талд их хэмжээгээр оруулах зорилготой бөгөөд агаар сэлгэлт, байгалийн гэрэл нэвтрүүлэх байдлыг Монгол гэрийн технологийг ашигласан гэдгээрээ онцлог юм. Харин барилгын гадна дизайныг уламжлалт Монгол гэрийн хэлбэрийг сансарын хөлгийн хэв загвартай холбож, шинээр хэлбэр үүсгэх маягаар зурсан байна.
Сэтгэгдэл