Ядуусын хорооллынхонд зориулсан музей байгуулна

     Энэтхэгийн Мумбай хот 1.5 сая хүнтэй Дарави ядуусын хорооллынхонд зориулан музей байгуулахаар болжээ. “Смитсониан” сэтгүүлийн дамжуулснаар тус Дарави Дизайны музейн загварын зургийг Испанийн зураач гаргасан бөгөөд бүтээлээрээ мартагдсан, орхигдсон ядуусын амьдралыг харуулахыг зорьсон аж. “Даравигийн иргэд амьдралын хүнд хэцүү нөхцөлийг үл харгалзан бүтээж, туурвиж, зохиож, үйлдвэрлэж чаддаг. Тиймээс энэ дүүргээс гарсан бүтээлүүдийг уг музейд тавьж, тэдний үнэ цэнийг бусдад харуулахыг зорилоо” хэмээн музейн үүсгэн байгуулагчид ярьжээ. Зөөврийн байгууламжийн хэлбэрээр байгуулсан тус музейг энэ хоёрдугаар сард нээж, хоёр сарын турш аялуулаад Дарави дүүргийн оршин суугчдад хүлээлгэн өгөх юм.