4 дунд сургууль, 3 цэцэрлэгийн барилгыг нураана

    Сүүлийн жилүүдэд Концессын гэрээгээр төсөл хөтөлбөрүүдийг хэрэгжүүлэх болсон. Концесийн гэрээний “Барих-шилжүүлэх” төрлөөр хэрэгжүүлэх ”Дунд сургууль, сургуулийн өргөтгөл, цэцэрлэг барих төсөл”-ийн хүрээнд Улаанбаатар хотод 38, 73, 32, 14 дүгээр дунд сургууль, 10, 18, 146 дугаар цэцэрлэгийг тус тус буулгаж, барилга байгууламжийг барихыг өнөөдөр болсон Засгийн газрын хуралдаанаар шийдвэрлэжээ.
     Энэхүү ажлыг холбогдох хууль тогтоомжийн дагуу удирдан зохион байгуулахыг Аж үйлдвэрийн яамны сайд Д.Эрдэнэбатад үүрэг болгосон бөгөөд концессын гэрээг “Залуучуудын нээлттэй боловсролын корпораци” ХХК-тай байгуулах эрхийг Хөрөнгө оруулалтын газарт олгож, гэрээ байгуулах Концесс эзэмшигч нь эдгээр сургууль, цэцэрлэгийн барилгыг 14 сарын дотор буулгаж, бүрэн барьж дуусган ашиглалтад хүлээлгэн өгөхийг даалгасан байна. Мөн ашиглалтад хүлээлгэн өгсөн өдрөөс хойш барилгуудын баталгаат хугацаа 3 жил байна. Энэ хугацаанд барилгын чанараас шалтгаалсан эвдрэл, гэмтлийг концесс эзэмшигч өөрийн зардлаа бүрэн хариуцаж засварлана. Төслийн хөрөнгө оруулалтын гэрээний үнийн эргэн төлөлтийг барилга байгууламжийг ашиглалтад хүлээн авсан өдрөөс эхлэн 5 жилд багтаан  хуваарийн дагуу жил бүрийн улсын төсөвт тусгахаар гэрээний төсөлд заажээ.