Хуучирсан мэдээ: 2019.11.05 14:32 -д нийтлэгдсэн

Баянхошуу, Долоон буудал орчмыг нийслэлийн дэд төв болгоно

Өлзийням Пүрэвжав

2019.11.05

Баянхошуу, Долоон буудал орчмыг нийслэлийн дэд төв болгоно

УИХ-аас Улаанбаатар хотыг 2020 он хүртэл хөгжүүлэх ерөнхий төлөвлөгөөнд 8 дэд төвтэй байхаар тусгасан. Энэхүү ажлын эхлэл болгож Улаанбаатар хотын хойд хэсгийн гэр хороолол болох Долоон буудал болон Баянхошуу орчмыг “Сэлбэ” ба “Баянхошуу” дэд төв болгон хөгжүүлэхээр зэхэж байна. “Азийн хөгжлийн банк”-тай хамтран хэрэгжүүлэх энэхүү төсөлд зориулан 320 сая долларын зээлийг хөнгөлттэй нөхцөлөөр авч байгаа бөгөөд 60 сая долларыг “Европын хөрөнгө оруулалтын банк”-наас авахаар тохиролцсон байна. Энэхүү зээл нь жилийн 2 хувийн хүүтэй, эхний 5 жилд хүүгийн болон зээлийн төлбөрөөс чөлөөлөх хэлэлцээртэй гэнэ.

“Баянхошуу” дэд төв нь СХД-ийн 7, 8, 9, 10, 28 дугаар хорооны нийт 162 га талбайг хамруулан дахин төлөвлөж, сургууль, цэцэрлэг, мэргэжлийн сургалт үйлдвэрлэлийн төв, худалдаа үйлчилгээний цогцолбор, соёлын төв зэргийг цогцоор нь барихаас гадна, автозам, явган зам, тохижилт, гэрэлтүүлэг, ногоон байгууламжийг хамтад нь хийхээр тусгасан байна.
Харин “Сэлбэ” дэд төв нь Чингэлтэй дүүргийн 14, 18 Сүхбаатар дүүргийн 14 дүгээр хорооны 156 га талбайг дахин төлөвлөж, барилга байгууламж барих юм.

Энэхүү томоохон бүтээн байгуулалтын ажилтай холбоотойгоор нийслэлийн Засаг дарга өнгөрсөн 7 хоногт Баянхошуу, Долоон буудлын иргэдтэй уулзан, төслийн явцын талаар мэдээлэл өгчээ.
Засгийн газрын хуралдаанаар эхний ээлжийн 104 сая доллартай тэнцэх санхүүгийн эх үүсвэрийг шийдвэрлэж өгвөл энэ жилийн 7-р сараас дэд төвийн ажлууд эрчимжиж эхэлнэ гэдгийг Хотын дарга онцолсон.

“Баянхошуу”, “Долоон буудал”-ыг хотын дэд төв болгон хөгжүүлснээр 400 мянган иргэн инженерийн болон нийгмийн дэд бүтцээр хангагдсан, эрүүл аюулгүй орчинд амьдрах боломжтой болно.