Автобусны буудлыг шинэчлэв
Нийслэлийн Тээврийн газрынхны мэдээлснээр хотод 600 гаруй автобусны буудал байдаг аж. Үүнээс дөрвийг нь шинэчлээд байгаа бөгөөд байгалийн үзэгдлээс хамгаалсан саравчтай, автобусны чиглэл, буудлын нэрийг тодорхой бичсэн, мэдээллийн самбарууд нь давхар усны хамгаалалттай, тог бага зарцуулдаг led гэрэлтүүлэгтэй байгаа нь стандарт шаарлагад нийцүүлэхийг хичээсэн гэдэг нь харагдав. Цаашилбал хөгжлийн бэрхшээлтэй иргэдэд зориулсан мэдээлэл түгээх аудио төхөөрөмжтэй. Автобус хүлээж буй иргэдэд зориулан 20 минут үнэгүй интернет хэрэглэх wifi төхөөрөмж суурилуулж байгаа юм байна. Энэ ондоо багтааж 69 автобусны буудал барихаар төлөвлөсөн бөгөөд гүйцэтгэгч компаниар Францын “JCDecaux” ажиллаж буй.
Хүсэн хүлээсэн машин
Хотод ус агаар мэт хэрэгтэй байгаа зүйл бол борооны ус зайлуулах байгууламж. Хөрөнгө мөнгөний боломжоос шалтгаалж нэн даруй барьж байгуулах боломжгүй ч түр зуурын арга ч болтугай хэрэглэх шаардлагатай болчихоод байгааг борооны дараах Улаанбаатарын нөхцөл байдал харуулдаг. Нийслэлийн Хот тохижилтын газраас тогтоол усыг соруулах ажлыг зохион байгуулж эхэлсэн бөгөөд одоогоор Зам цэвэрлэгээний албаны 8 машин Энхтайваны өргөн чөлөө, Олимпийн гудамж, Бага тойруу, Их тойруу зэрэг газарт ажиллаж байна. Олон нийтийн сүлжээгээр бохир усаа Туул голд асгаж байна хэмээн тархсан шуугианы хариуд хотын ариутгах татуургын систем салангид төлөвлөгдсөн байдаг бөгөөд автозамын ус зайлуулах шугам, далан суваг нь гол руу шууд нийлж, усаа шахдаг онцлогтой учраас буруу ойлголт төрүүлсэн байж магадгүй гэлээ. Хэдийгээр зориулалтын байгууламжийг нэн даруйд барих боломжгүй ч далайн ус адил хотын гудамж талбайгаар “давалгаалах” үед нь түр ч болтугай арга хэмжээ авч байгаа нь сайшаалтай.
500 сая төгрөгний цэцэрлэгжүүлэлт
Нийслэл хотын ногоон байгууламжийн арчлалт хамгаалалтын ажлын дагуу энэ жил 5.8 тэрбум төгрөг төсөвлөжээ. Нийслэлийн төвийн 6 дүүргийг хамарсан нийтийн эзэмшлийн гудамж талбайн ногоон байгууламжийн арчилгаа, нөхөн сэргээлт, хамгаалалтын ажил тухайлбал ногоон байгууламжийн нэгдсэн тооллого, усалгаа, мод хэлбэржүүлэлт, хортон шавьжнаас урьдчилан сэргийлэх шохойдолт зэрэг ажлыг “Нийтийн үйлчилгээний Улаанбаатар нэгтгэл” ээс хийж байна. Мод суулгах ажил өнгөрсөн дөрөвдүгээр сараас эхэлсэн бөгөөд 400 мянга гаруй мод, бут сөөг тарьжээ. Ногоон байгууламжийн усалгааг өдөр бүр тусгай зориулалтын 12 машин хийж буй аж. Өнгөрсөн жил хотын иргэдэд таалагдсан нэг наст цэцэг суулгах ажил Энхтайваны өргөн чөлөө, Ард Аюуш болон Чингисийн өргөн чөлөө, Нийслэл хүрээ гудамжинд үргэлжилж байна. Мөн 22-ын товчоо, Долоон буудал, Үйлдвэрчний эвлэлийн гудамж зэрэг хотоос зайдуу хэсэг газруудад суулгах аж. Нийт 500 сая төгрөг зарцуулж буй цэцэрлэгжүүлэлтийг ажил араасаа хэл ам чамгүй дагуулж байгаад албаны хүмүүс зөвхөн нэг зуны биш цаашид амьдрах настай ургамал учраас мөнгө зарлагадсан ажил биш гэсэн тайлбарыг өгч байна.
Сэтгэгдэл