“Хайрын төгөл” үүдээ нээлээ

    Нийслэл хотод залууст зориулсан бас нэгэн газар бий болсон нь “Хайрын төгөл”. Нийслэлийн Захирагчийн ажлын албанаас санаачлан баруун 4-н замд байрлах  “Барилгын хөгжлийн төв”-ийн өмнөх хэсэгхэн зайд тохижилт хийн “Хайрын төгөл” хэмээн нэрийджээ. Хүүхэд, залуусын амрах, тухлах бичил орчинг бүрдүүлэх зорилгоор энэхүү газрыг тохижуулсан бөгөөд хайрыг мөнхлөх хос цоож зүүх хэсгийг ч мөн бэлдэж өгсөн байна. Улаанбаатар хотын ерөнхий менежер Б.Бадрал “Хайрын төгөл”-ийг нээлж хэлсэн үгэндээ “Бид нийслэлээ дэлхийн хотуудын жишигт хүргэх гэж хичээж байгаа. Тиймээс олон зүйлийг санаачлан ажиллаж байна. Магадгүй зарим хүмүүс энэ газрыг шүүмжилж болох юм. Гэхдээ шүүмжлэхээсээ илүү дэмжиж ажиллавал урам зориг өгөх биз ээ. “Хайрын төгөл”-д цаашид ч нэмэлт тохижилтуудыг хийн улам өргөжүүлэх юм” хэмээсэн. Мөн энэхүү нээлтийн ажиллагааны үеэр хосууд цоож зүүх ажиллагаа болсон юм.  
     Энэ хэсгийн тохижилтын ажлыг “В дизайн” компаний хамт олон хариуцан хийж байгаа юм байна.