Хуучирсан мэдээ: 2019.11.05 14:48 -д нийтлэгдсэн

Зуслангийн газар өмчлөл явагдаж байна

Өлзийням Пүрэвжав

2019.11.05

“Газар өмчлөлийг эрчимжүүлэх” ажлын хүрээнд нийслэлийн иргэд саяхан анх удаа цахим бүртгэлээр газраа өмчилж авсан. Үүнтэй зэрэгцээд бас нэгэн ажил зохиогдож байгаа нь зуслангийн газар өмчлөл юм. Өнгөрсөн 8-р сарын 1-нээс эхлэн одоогоор нийслэлийн нутаг дэвсгэрт зуслангийн зориулалтаар газар эзэмшиж байгаа иргэд тухайн газраа өмчилж авахаар хүсэлт гаргахыг нээлттэй болгож өгсөн.
Нийслэлийн Чингэлтэй, Сүхбаатар, Сонгинохайрхан дүүргүүдэд зуслангийн зориулалтаар эзэмшиж байгаа газруудад урьдчилсан тооллого хийсэн бөгөөд 47943 нэгж талбар байгаагаас 24793 нэгж талбарт нь газар өмчлүүлэх боломжтой гэсэн судалгаа гарчээ. Ойн болон усны сан бүхий газар, тусгай хэрэгцээний газар, зам, шугам сүлжээний газраас бусад зуслангийн зориулалтаар эзэмшиж байгаа газрыг өмчлүүлэх юм.
Газар өмчлөх иргэд ямар материал бүрдүүлэх вэ?
1.Газар өмчлөх тухай хүсэлт гаргах батлагдсан маягтын дагуу бөглөх,
2.Иргэний үнэмлэхний нотариатаар гэрчлүүлсэн хуулбар,
3.Газар эзэмших эрхийн гэрчилгээ /эх хувиар/,
4.Газрын кадастрын зураг,
5. Газрын төлбөрийг зохих журмын дагуу тушаасан байх шаардлагатай юм.
Харин 0.7 га газар өмчилж авсан иргэд зуслангийн газар давхар өмчлөх боломжгүй аж.