Галт тэргэнд шүргүүлсэн иргэн хүнд гэмтлээ

        Өчигдөр оройн 20.00 цагийн орчимд нийслэлийн Баянзүрх дүүргийн нутаг Замын цагдаагийн газрын урд байх төмөр замын 406 дугаар гармын IV секторын орчимд галт тэргэнд хүн шүргүүлсэн гэх мэдээлэл ирлээ. Уг ослын талаар тодруулахад, тухайн үед 60 орчим настай нэгэн хөгшин төмөр зам дээр гэнэт гарч ирсэн байна. Тэрбээр төмөр зам дээгүүр гарахыг оролдож байхдаа галт тэрэгний салхинд шидэгдсэн байх магадлалтай хэмээн албаны эх сурвалж мэдээллээ. Ослын улмаас дээрх иргэн гэмтэж, ГССҮТ-д хүргэгджээ. Мөн Баянгол дүүргийн V хорооны нутагт дулааны шугамын ажил хийж байсан “Визард” констракшны эзэмшлийн том оврын машин тус дүүрэгт оршин суух нэгэн иргэнийг дайрч, амийг нь хөнөөсөн хэрэг гарсан юм.