ДАВАЛГААНААС ХАМГААЛАХ БАЙГУУЛАМЖ БИЙ БОЛОВ

ТОКИО./ИТАР-ТАСС/. Осол гарсан «Фүкүшима-1» атомын цахилгаан станцын орчмын бүсэд 7-8 метр өндөр цунамигийн цохилтыг тэсвэрлэж чадахуйц давалгаанаас хамгаалах түр байгууламжийг барьж дууслаа. Энэ тухай Токио электрик пауэр /ТЭПКО/ компани мэдээлжээ. Дээрх хэмжээний өндөртэй цунами нь 8 баллын хүчтэй газар хөдлөлтийн үед үүснэ гэж мэргэжилтнүүд үзэж байна. Шинэ хамгаалалтын шугам нь 362 метрийн урттай ба 3-р реакторын хөдөлгүүрийн хэсэг, цацраг идэвхт шингэн хаягдлын агуулах зэрэг станцын нутаг дэвсгэрт байрлах объектуудыг далайн давалгаанаас хамгаалах зориулалттай юм. «Фүкүшима-1»-д осол гарсан шалтгааны талаар дахин өгүүлэхэд, 3 дугаар сарын 11-ний өдөр Хоншю аралд болсон 9 баллын хүчтэй газар хөдлөлтийн улмаас уг станц гадаад эх үүсвэрээс салгагдах үед нөөц төхөөрөмжийг ажиллуулсан эхэлсэн байна. Гэвч газар хөдлөлтийн улмаас үүссэн 15 метр өндөр цунамигийн цохилтод өртсөн тэдгээр төхөөрөмжүүд бүрэн эвдэрсэн учир реакторуудыг хөргөх төхөөрөмжүүд ажиллагаагүй болжээ. Реакторуудаас гурван реактор, түүний дотор 3-р реакторт ноцтой гэмтэл гарсан юм.