Дарь-Эх Шадивлангийн чиглэлийн зам ашиглалтад орно

Сансарын Шатахуун түгээх станцаас Дамбадаржаа хүртэлх 6.7 км, Дамбын замаас Сэлбийн зүүн эргээр Шадивлан хүртэлх 6.7 км авто замуудын нээлтийн ажиллагаа өнөөдөр 14 цагт болно.

Дарь-Эхийн хэмээн нэрлэгддэг 6.7 км авто замыг анх 1979 онд барьж ашиглалтад оруулж байсан. Долоон метр өргөнтэй байсан энэ замыг 9 метр болгон өргөсгөж, 2.25 метр өргөнтэй явган хүний зам, гэрэлтүүлэг тавин нээж байна.

Дарь-Эхийн замын трасст орсон 84 айл, объектын газар чөлөөлөх ажил явагдсан бол Шадивлан чиглэлийн 6.0 км авто замын трасст орсон 88 айл, объектын газрыг чөлөөлж зам барилгын ажлыг гүйцэтгэсэн юм. Шадивлан хүртэлх замын өргөн 9 метр, явган хүний замын өргөн 1.5 метр.

Эдгээр замууд дахь Сэлбэ болон Бэлхийн гол дээгүүрх хоёр гүүрийн шинэчлэлтийн ажлыг нийслэлийн төсвийн хөрөнгө оруулалтаар гүйцэтгэсэн.

Төмөрбетон гүүрүүдийн нийт урт 83 метр. Дээрх авто зам, гүүрүүдийн барилгын ажлыг "Эйч Кэй Би интернэшнл холдинг" компани өөрийн хөрөнгөөр гүйцэтгэн эргэн төлөгдөх нөхцөлтэйгөөр барьж дуусгаад байгаа бөгөөд нээлтийн үйл ажиллагаанд Нийслэлийн удирдлагууд оролцоно.