Нийтийн эзэмшлийн зам талбайн ашиглалтыг сайжруулж, тохижуулах тухай Нийслэлийн Засаг даргын захирамж гарлаа. Өнгөрсөн онд НИТХ-ын Тэргүүлэгчдийн тогтоолоор “Нийслэлийн нутаг дэвсгэрт хашаа барьж ашиглах тухай журам”-ыг баталсан.
Энэ журмын дагуу явган болон авто замын хөдөлгөөнийг хязгаарлаж зөвшөөрөлгүй баригдсан төрөл бүрийн хашаа, хайсыг буулган цэгцлэн нийтийн эзэмшлийн зам талбайн ашиглалтыг сайжруулж автомашины зогсоолын талбайг нэмэгдүүлэх, үйл ажиллагааны зайлшгүй шаардлагаар байх хашааны өнгө үзэмжийг сайжруулах, хот тохижилтын ажилтай уялдуулан ногоон байгууламж бүхий хэсгийг тусгаарлах хайсыг нэгдсэн хэв загварт оруулах ажлуудыг үе шаттай хэрэгжүүлэхийг холбогдох албаны хүмүүст даалгажээ.
Энэ ажлыг Нийслэлийн хэмжээнд үйл ажиллагаа явуулж буй төрийн байгууллагуудаас эхлүүлэх бөгөөд нийслэлд төрийн үйлчилгээ явуулдаг 106 байгууллагын 51 нь гадуураа хашаатай юм. Үүнээс 24 байгууллагын хашааг буулгаж чөлөөлөх боломжтой агаад хашаа, хайс байсан газарт ногоон байгууламж, усан оргилуур бүхий тохижилтын ажил хийнэ. Тохижилтоор тэргүүлсэн газруудыг намар Нийслэлийн өдрөөр шалгаруулж, шагнах юм.
Улаанбаатар
Сэтгэгдэл