Тусгай зөвшөөрлөөр зам сэтэлдэг

Аж ахуйн нэгж байгууллагууд болон иргэд хэрэгцээний шаардлагаар шилэн болон цахилгааны кабель, дулааны шугам, цэвэр, бохир усны шугам суулгах зорилгоор зам сэтлэх болон ерөнхий төлөвлөгөөнийхөө дагуу орц, гарц гаргах, зогсоолын талбай барих шаардлага урган гарч ирдэг. Тиймээс тухайн аж ахуйн нэгж байгууллага хувь хүн авто зам сэтэлж үйл ажиллагаа явуулах болон автозамын сүлжээнд холбогдож, орц гарц гаргах, зогсоолын талбай хийх байгууллага, иргэд хүсэлтээ Нийслэлийн автозамын газар, замын цагдаагийн газарт бичгээр гаргах бөгөөд доорхи материалуудыг хавсаргасан байна. Үүнд:

1. Авто зам сэтэлж үйл ажиллагаа явуулахдаа шугам сүлжээний ажил хийх зөвшөөрөл, техникийн нөхцөл, шугам сүлжээний ажлын зураг схем, ажил гүйцэтгэх график зэрэг шаардлага хангасан материал
2. Нийслэлийн автозамын сүлжээнд холбогдож орц гарц гаргах, зогсоолын талбай хийхдээ ерөнхий төлөвлөгөө, ажлын зураг схем, шугам сүлжээний байгууллагын техникийн нөхцөл зэрэг шаардлага хангасан материалыг хавсаргана.

Зам сэтлэх зөвшөөрлийг НЗДТГ-ын Хотын хөгжлийн бодлогын хэлтэс, Улаанбаатар хотын захирагчийн ажлын албаны Хот нийтийн аж ахуйн хэлтэс, Нийслэлийн автозамын газар, Замын цандаагийн газраас хамтран зохион байгуулсан комисс газар дээр нь очиж үзээд хамтарсан хурлаар олгох эсэхээ шийддэг. Зам сэтлэх үед Улаанбаатар хотын ерөнхий менежерийн баталсан “Улаанбаатао хотын инженерийн шугам сүлжээ хий болон өргөтгөх зорилгоор авто зам сэтлэх ажлын зөвшөөрөл олгох, гүйцэтгэх журам”, “Нийслэлийн авто замын сүлжээнд холбогдож, орц гарц гаргах, зогсоолын талбай хийх ажлын зөвшөөрөл олгох, гүйцэтгэх журам”-ыг тус тус баримтлан ажилладаг байна.
Жил бүрийн 5-р сарын 15-наас 9-р сарын 15-ныг хүртэлхи хугацаанд зам сэтлэх ажлыг хийх хэрэгтэй. Нийслэлийн автозамын газрын зөвшөөрсний дагуу нөхөн сэргээлтийн дагуу, нөхөн сэргээлтийн төлбөр төлсөн газруудад зам сэтлэх ажлыг ихэвчлэн хөдөлгөөний ачаалал багассан үед орой 21 цагаас хойш, бүр хөдөлгөөний ачаалал ихтэй гудамж, замуудад амралтын өдрүүдэд зам сэтэлгээний ажлыг хийхийг зөвшөөрдөг. Мөн Монгол улсын авто замын тухай хууль, Замын хөдөлгөөний аюулгүй байдлын тухай хууль, Захиргааны хариуцлагын тухай хууль болон бусад холбогдох хууль тогтоомжийн дагуу зам хууль бусаар, зөвшөөрөлгүй сэтэлсэн этгээдэд хариуцлага тооцдог байна.