Монголын эдийн засаг "тодорхойгүй байдлаас" гарч чадлаа
Монгол Улсын дотоодын нийт бүтээгдэхүүн 2017 онд дөрвөн хувиар тэлсэн гэж Азийн хөгжлийн банк таамаглаж байгаа юм. Өнгөрсөн оны эхэн үед тодорхойгүй байдал давамгайлж байсан бол одоо эдийн засаг хурдацтай сэргэж байгаа гэж ОУВС дүгнэсэн. Нүүрсний борлуулалт 120 хувиар өсөж, үйлдвэрлэлийн гарц 34 хувиар нэмэгдсэн, гадаад валютын нөөц 3.2 тэрбум ам.долларт хүрсэн зэрэг олон таатай дүн гарсан болохыг "Asia Pacific Investment Partners"-ийн шинжээч онцолж байна. 2018 оны тухайд гол төсөл болох Оюутолгойн үйл ажиллагааны зардлыг 2.8 дахин бууруулах боловч бүтээгдэхүүний гарцыг хоёр дахин нэмнэ гэж "Turquoise Hill Resources" мэдээлсэн. Цахилгаанжуулалт, автоматжуулалтыг нэмэгдүүлэх замаар төслийн үр ашгийг сайжруулах боломжтой гэж "Asia Pacific Investment Partners" харж байна.
Монголын хөрөнгийн зах зээлийн хувьд хурдацтай сэргэсэн. Топ-20 компанийн үнэлгээ 2017 онд 63 хувиар өсөж, Монголын хөрөнгийн бирж нийт 859.2 тэрбум төгрөгийн арилжаа хийсэн нь 26 жилийн түүхэн дэх анхны тохиолдол болсон. 2018 онд компаниуд шинээр IPO гаргахаар төлөвлөж байгаа юм. ОУВС-ийн хөтөлбөр хэрэгжиж эхэлсэн нь ийнхүү хөрөнгийн зах зээлд ч эергээр нөлөөлсөн. Гэхдээ Засгийн газар бүтцийн шинэчлэл хийхгүй бол энэ байдал түр зуурынх болж магадгүй гэж "Asia Pacific Investment Partners" харж байна. Энэ мэтчилэн олон хүчин зүйлээс хамаарч Монголын эдийн засаг 2011 оных шиг хурдацтай тэлээгүй ч 2016 оны хямралтай харьцуулахад тогтворжиж байгаа гэж үзсэн байна.