Монголын барилгын үндэсний ассоциацийн гишүүд Эрэл групп ХХК-ийн “Байшин үйлдвэрлэх комбинат”-тын үйл ажиллагаатай танилцлаа. Тус танилцах аялалд МБҮА-ийн УЗГ, гишүүн болон Ажлын албаны нийт 30 орчим хүн оролцсон бөгөөд Эрэл групп ХХК-ийн Ерөнхийлөгч Б.Эрдэнэбат өөрийн биеэр хүлээн авч танилцуулгыг хийв.

Социализмын үед ажиллаж байсан тус комбинатыг 1992 онд Эрэл групп ХХК худалдан авч, 2017 оны 12 дугаар сард ашиглалтанд оруулсан бөгөөд ХБНГУ-аас бүх тоног төхөөрөмжөө оруулан ирж, хамгийн сүүлийн үеийн технологийг нэвтрүүлсэн “Байшин үйлдвэрлэх комбинат” нь жилдээ 250-300 мянган м2 ашигтай талбайг үйлдвэрлэх хүчин чадалтай юм.
Тус комбинат нь Дотор хана болон багана, дам нурууны цех, Хучилтын нүхт хавтангийн цех, Зуурмагийн цех, Гадна хананы цех, Арматурын цехүүдээс бүрдэх ба жилийн улирал харгалзахгүй үйл ажиллагаагаа явуулах боломжтойгоороо онцлог гэв.


Эрэл группийн Ерөнхийлөгч Б.Эрдэнэбат, Хөгжлийн банкнаас 14 сая ам.долларын зээлийг авсан. Манай улсад баригдаж байгаа барилга байгууламжийн материалын 60-70 хувь нь импортын бүтээгдэхүүн байдаг. Тэгвэл “Байшин үйлдвэрлэх комбинат” нь импортоос хараат бус 100 хувь дотооддоо үйлдвэрлэсэн бүтээгдэхүүнийг гаргах бололцоотой,   учир   нь   цемент, элс, хайрга гэх мэт бүх  түүхий  эдүүдийг  дотоодоосоо  авна.  Монгол Улсад барилга угсралтын тусгай зөвшөөрөлтэй 5,000 орчим аж ахуйн нэгж, тэдгээрт байнгын ажилладаг 100,000 орчим инженер, техникийн ажилчид байна. Гэвч тэдгээр ажилчид цаг агаараас хамааран жилийн 6 сард нь ажилгүй, зогсонги байдалтай байна. Тэгвэл манай үйлдвэр улирал харгалзахгүй ажиллаж, байшин угсрах боломжтой тул салбарын ажилчдыг тогтмол ажлын байраар хангах бүрэн боломжтой” гэв.
 

“Байшин үйлдвэрлэх комбинат” нь дараах давуу талуудтай. Үүнд:
 
1.  Барилгын өртгийг бууруулна.
2.  Загварын хувьд олон сонголттой.
3.  Бүх төрлийн барилгад хэрэглэгддэг.
4.  Барилгын хана хоорондох урт зайг тулгуургүйгээр барих боломжтой.
5.  Өндөр даацтай.
6.  Барилгын ашигтай талбайг нэмэгдүүлэх боломжтой.
7.  Аюулгүй ажлын байр.
8.  Галд онцгой тэсвэртэй.
9.  Хана тааз нь гөлгөр гадаргуутай учраас шууд будаж болно.
10. Халаалтын орчин үеийн шийдэлтэй.
11. Байгаль орчинд хоргүй эко материалуудыг ашигладаг.
12. Эдийн засагт хэмнэлттэй.
13. Барилга дээр цөөхөн хүн ажиллуулах боломжтой.
14. Богино хугацаанд хурдан барих боломжтой.
15. Үйлдвэрээс чанарын шаардлага хангасан бүтээгдэхүүн барилгад нийлүүлэгддэг учраас газар дээр нь цутгаж хийхээс илүү найдвартай.
16. Газар хөдлөлтөнд илүү тэсвэртэй зэрэг болно.