Барилгын салбартаа тэргүүлэгч, хөгжлийн үндсэн хандлагыг тодорхойлогч зураг төслийнхнийг нэгтгэдэг Барилгын зураг төсөл зохиогчдын холбоо бүх гишүүдийн хурлаа хийлээ. Хурлаар холбооны 2017 онд хийж гүйцэтгэсэн ажлын тайлангаа дүгнэж, дотоод асуудлаа хэлэлцэн хурлын тэргүүлэгчдээ сонгож, Удирдах зөвлөл болон хяналтын зөвлөлийн гишүүдийг шинэчлэн, 2018 оны төлөвлөгөө, ойрын таван жилийн хөгжлийн стратегиа хэлэлцэн баталсан юм.


           
   Энэ удаагийн хурлаас онцолж буй гол сэдэв нь мэдээж сургалт хариуцах, зэрэг дэв олгох үйл ажиллагааг явуулах асуудал байлаа. Монголын барилгын салбарын мэргэжлийн төрийн бус байгууллагууд нэгдэн нийлж, хамтран сургалт явуулах, зэрэг дэв тогтоох, тусгай зөвшөөрөл олгох зэрэг Төрийн байгууллагын зохион байгуулах зарим чиг үүргийг хэрэгжүүлэхээр болсон нь яах аргагүй энэ оны онцлох сэдэв юм. Эдгээр асуудлаар холбооны ерөнхийлөгчөөс тодруулахад,


 

-Жилд нэг удаа зохион байгуулагддаг энэхүү хурлын энэ жилийн онцлог, хэлэлцэж буй гол сэдэв юу байна?

-Тайлангийн хурал учраас өнгөрсөн жилийн ажлаа дүгнэж, ирэх оныхоо төлөвлөгөөг батлах юм. 2017 он бол бидний хувьд чухал жил байсан, гурван том үйл явдал болсон. Манай холбоо байгуулагдсаны 10 жилийн ой тохиож, тэмдэглэн өнгөрүүлсэн. Мөн оны өмнөхөн Барилга, хот байгуулалтын сайдын тусгай зөвшөөрөл олгох болон мэргэжил дээшлүүлэх сургалтанд төрийн бус байгууллагуудыг оролцуулах тушаал гаргалаа. Үүний дагуу энэ жилийн ажлын төлөвлөгөөнд зарчмын томоохон өөрчлөлт орж байна. Манай байгууллага урьд нь хөндлөнгийн, шүүмжлэгчийн байр сууринаас хандаж байсан бол одоо салбарын үйл ажиллагаанд өөрсдөө шууд оролцох боломж нээгдэж байгаа юм. Тэгэхээр өнөөдөр хэлэлцэх асуудлын гол хэсэг нь энэ байх болно. Мөн дүрмийн дагуу манай холбоо жилдээ нэг удаа Удирдах зөвлөлийн гишүүдийн 30 хувийг сольдог. Түүнчлэн холбооны цаашдын стратеги төлөвлөгөөг боловсруулсныг гишүүдээр хэлэлцэх гэж байна.

-2018 он барилгын салбарт ямар өгөөжтэй байгаасай гэж бодож байна вэ?

-Одоо барилгын салбар маань хямралын доод цэгтээ хүрчихсэн байгаа учраас үүнээс илүү муудах боломж байхгүй л дээ. Ихэнх компани ажилгүй, эсвэл маш бага дүнтэй ажил гүйцэтгэж байна. Ер нь салбарын чиг хандлага ямар байх нь засаглалаас хамаарна. Тэд ухаантай ажиллаж чадвал салбар сэргэж чадна шүү дээ. Үүнээс гадна энэ жилийн томоохон ажлуудын нэг нь тасралтгүй сургалт явуулах үйл ажиллагаа юм. Барилгын салбар нийтдээ инженерийн мэргэжлийн чадавх сайжруулах сургалтыг мэргэжлийн холбоод нэгдэн явуулах гэж байна. Барилгын хөгжлийн төв дээр бүх төрлийн сургалт байнга явагдаж байдаг. Хүн зэрэг авах гэж биш, юм сурах гэж зорьж ирдэг болох нээлттэй тогтолцоог сургалтанд нэвтрүүлэх нь энэ жилийн бидний гол зорилго юм гэлээ.



   Хурлын явцад гишүүд үйл ажиллагаа болон санхүүгийн тайлантай танилцаж, стратеги төлөвлөгөө болон дотоод үйл ажиллагаатай холбогдолтой саналуудаа хэлж байсан юм.

   Ингээд хурлаар холбооны 2017 оны үйл ажиллагааны тайлан болон санхүүгийн гүйцэтгэлд хийсэн хяналтын зөвлөлийн тайланг хангалттай гэж дүгнэсэн юм. Цаашлаад холбооны өөрийн хөгжлийн бодлого, хэтийн зорилт, хөгжлийн баримт бичигтэй байх нь чухал гэж үзээд 100 хувийн саналаар дэмжиж, редакцын чанартай засвар өөрчлөлтийг оруулахаар боллоо.



   Түүнчлэн холбооны Дүрмийн өөрчлөлтийн төслийг, хамтын удирдлагын системийг давуу болгох, БЗТЗХ гэсэн нэрний өмнө “Монголын” гэдэг үг нэмж “Монголын барилгын зураг төсөл зохиогчдын холбоо” (МБЗТЗХ) гэсэн албан ёсны нэртэй болгох саналыг гишүүд дэмжлээ. Дараа нь “Холбооны 2018 оны хийх ажлын төлөвлөгөөний төсөл”-ийг хэлэлцэн баталснаар үйл ажиллагаандаа мөрдлөг болгож ажиллахаар болсон юм.



   Жил бүрийн бүх гишүүдийн хурал дээр Холбооны удирдах зөвлөлийн гишүүдийн 30 хувийг шинэчлэн сонгодог уламжлалын дагуу шинээр “Криетив Монголияа” ХХК-ийн захирал, бүтээцийн инженер Д.Занабазар, “Номин констракшн” ХХК-ийн бүтээцийн инженер Г.Содгэрэл, “Дукат” ХХК-ийн захирал, цахилгааны инженер С.Алтанцэцэг нарыг санал нэгтэйгээр сонгож, Хяналтын зөвлөлийн гишүүдийг хуучин бүрэлдэхүүнээр нь хэвээр үлдээснээр МБЗТЗХ-ны бүх гишүүдийн хурал өндөрлөсөн юм.

Жич: МБЗТЗХ-ны 2018 оны ажлын төлөвлөгөөг www.zuragtusul.mn вэбээс авна уу.