БНХАУ-ын хөнгөлөлттэй зээлээр Гачууртын уулзвараас Налайх, Чойрын уулзвар хүртэлх 20.9 км авто замыг өргөтгөн шинэчлэхээр болсон. Замын трасст багтсан барилга байгууламжуудыг өнгөрсөн жил чөлөөлсөн юм. Нийт 120 барилга байгууламж байснаас зөвшөөрөлтэй 82, зөвшөөрөлгүй 38 барилга байгууламж байжээ. Улмаар өнгөрсөн онд газар чөлөөлөх ажлыг хийж дуусган замын ажлаа эхлүүлэхээр төлөвлөөд байсан боловч хоёр улсын хооронд байгуулах хэлэлцээр удааширсан учраас хойшлуулсан юм. Харин энэ онд эхлүүлэхэд бэлэн болсон бөгөөд хоёр жилийн хугацаанд барьж дуусгахаар төлөвлөжээ. Баригдаад 60 жил болж буй энэ замыг шинэчилснээр Улаанбаатар хотын түгжрэл тодорхой хэмжээгээр буурна гэсэн тооцоо гарчээ. Учир нь, таван аймаг, гурван дүүрэг рүү зорчиж буй иргэд ганцхан энэ замаар хотоос гардаг учраас Улаанбаатар хотын түгжрэлд маш их нөлөөлдөг байна.