67 жилийн настай Монголын үндэсний номын сангийн барилга ашиглалтын шаардлага хангахгүйг мэргэжлийн байгууллага тогтоосноос хойш багагүй хугацаа өнгөрч байна. 12 тэрбум төгрөгийн өртөгтэй шинэ номын санг барьж эхэлсэн ч эдийн засгийн чадамжгүйгээс царцсан барилгуудын эгнээнл шилжжээ. 

Анх 500 мянган номтой байсан номын сан өдгөө гурван сая гаруй ном судартай, номын есөн фонд, уншлагын таван танхимтай болон өргөжсөн. Гэвч “хөгширсөн” барилга нь  ном судраа борооны ус, чийгшлээс хамгаалж чадахаа больсны дээр уншигчдын аюулгүй байдалд заналхийлэх болжээ. 

2018 оны улсын төсвийн 39 хувь буюу 883 тэрбум төгрөгийг боловсролын салбарт зарцуулахаар тусгасан. Энэ мөнгөний дөнгөж 0.1 хувь буюу 1 тэрбумыг төв номын сангийн барилгын ажилд зарцуулна. 30 хувийн гүйцэтгэлдээ царцсан номын сангийн барилга энэ онд ч “гэсэхгүй” нь тодорхой байна.