Барилга, хот байгуулалтын сайд Х.Баделхан барилгын салбарт үйл ажиллагаа явуулж буй төрийн бус байгууллагуудын төлөөллийг хүлээн авч уулзлаа. Тэрээр уулзалтын эхэнд хэлсэн үгэндээ “Ипотекийн зээл өнөөдөр нэн яаралтай шийдвэрлэх асуудлын нэг болоод байна. Барилгажуулахын тулд энэ арга хэмжээг яаралтай авах шаардлагатай” хэмээн онцоллоо. Мөн барилгын салбарт судалгаа шинжилгээний байгууллага шаардлагатай байгаа учир судалгааны хүрээлэн байгуулах талаар ярилцаж байгааг мэдээллээ.

  Сайд төрийн зарим чиг үүргийг төрийн бус байгууллагуудад шилжүүлэх асуудлыг дэмждэгээ илэрхийлээд “Юуны өмнө тусгай зөвшөөрөл болон сургалтын асуудлыг хариуцуулах саналтай байгаа. Гэхдээ бид хүчээр шийвэр гаргахгүй. Эцсийн шийдвэрийг сайдын зөвлөл гаргана. Ер нь яам та бүхнийг дэмжиж ажиллана. Хамгийн гол нь барилгын чиглэлийн төрийн бус байгууллагууд нэгдэж ажиллах хэрэгтэй. Төрийн бус байгууллагуудынхаа хүрээнд өргөн хүрээтэй уулзалт зохион байгуулж, нэгдсэн нэг ойлголттой болоод дахин саналаа өгөөрэй” гэв.

  Уулзалтад оролцсон төрийн бус байгууллагуудын төлөөлөл сайдын саналыг дэмжиж байгаагаа илэрхийлээд хоорондоо ярилцаж нэгдсэн шийдэлд хүрээд салбарын яаманд саналаа хүргүүлэхээр болсон байна.