Энэ хүрээнд өнөөдөр “Төсөв, нийгэм болон эдийн засгийн шинэчлэлийн хөгжлийн бодлогын зээл”-ийн Засгийн газар хоорондын Солилцох ноот бичигт Гадаад харилцааны сайд Д.Цогтбаатар, Япон Улсаас Монгол Улсад суугаа Онц бөгөөд Бүрэн эрхт Элчин сайд Такаока Масато нар гарын үсэг зурлаа. Мөн зээлийн төслийн гэрээнд Сангийн сайд Ч.Хүрэлбаатар, “ЖАЙКА” олон улсын байгууллагын Тэргүүн дэд ерөнхийлөгч К.Кошикава нар гарын үсэг зурсан юм.

ОУВС-гийн “Өргөтөгөсөн санхүүжилтийн хөтөлбөр”-ийн хүрээнд Япон улс Монголд 850 сая ам.долларын хөнгөлөлттэй зээл олгохоо илэрхийлсэн. Энэ хүрээнд олгож буй эхний 32 тэрбум иен буюу 283.3 сая ам.доллартай тэнцэх хэмжээний зээлийг Монгол Улсын төсөв, эдийн засгийг шинэчлэх бодлогод зарцуулах болжээ. Уг зээл нь жилийн 0.8 хувийн хүүтэй бөгөөд 20 жилийн хугацаатай аж. Энэхүү хөрөнгийг ойрын хугацаанд Монгол Улсад шилжүүлэхэд анхаарч ажиллахаа “ЖАЙКА” олон улсын байгууллагын Тэргүүн дэд ерөнхийлөгч К.Кошикава гарын үсэг зурах үеэрээ онцлов.

Тэрбээр, “Миний бие өчигдөр Хөшигийн хөндийд шинээр барьж буй нисэх буудлын бүтээн байгуулалтын явцтай танилцлаа. Мөн Улаанбаатар хотын агаарын бохирдол, Монгол Улсын байгаль орчны доройтлын талаар холбогдох байгууллагын хүмүүстэй уулзаж санал солилцсон. Дээрх асуудлуудыг шийдвэрлэх чиглэл манай байгууллага Монгол Улстай хамтран ажиллах болно” гэлээ.

Япон Улс 1990 оноос Монголын эдийн засагт үүссэн аливаа хүндрэлийг даван туулахад үргэлж туслаж ирсэн гэдгийг Сангийн сайд Ч.Хүрэлбаатар онцлов. Тухайлбал, 1991, 1993 онд эдийн засгийн хүндрэлийг даван туулахад 7,3 тэрбум иен, 2009, 2012 онд 50 сая ам.долларын тусламж үзүүлж байжээ.