Өнөөдөр "Улаанбаатар дулааны сүлжээ” ТӨХК-ийн  хурлын танхимд Улаанбаатар хотод дулаан түгээх, дулаанаар зохицуулалттай хангах үйл ажиллагаа эрхэлж буй тусгай зөвшөөрөл  эзэмшигчдийн уулзалт-зөвлөгөөн болж байна. Энэхүү уулзалт зөвлөгөөнийг Эрчим хүчний зохицуулах хороо, "Улаанбаатар дулааны сүлжээ” ТӨХК-тай хамтран зохион байгуулж байгаа бөгөөд зөвлөгөөнд Нийслэлийн засаг даргын тамгын газар, Улаанбаатар хотын захирагчийн ажлын алба, "ДҮТ” ХХК,  "ОСНААУГ”, хувийн хэвшлийн орон сууцны компаниуд зэрэг 40 гаруй байгууллагын 140 гаруй төлөөлөл оролцож байгаа юм.



  Улаанбаатар хотод дулаан түгээх, дулаанаар зохицуулалттай хангах үйл ажиллагаа эрхэлж буй тусгай зөвшөөрөл эзэмшигчдийн уулзалт-зөвлөгөөнийг  нээж, Эрчим хүчний зохицуулах хорооны дарга А.Тлейхан үг хэлсэн бөгөөд тэрээр хэлсэн үгэндээ "Өнөөдрийн энэхүү уулзалт зөвлөгөөн өвлийн оргил ачаалал эхэлж буй энэ үед болж байгаагаараа чухал ач холбогдолтой. Эрчим хүчний зохицуулах хороо нь тусгай зөвшөөрөл эзэмшигч, хэрэглэгчийн эрх ашгийг тэнцвэртэй хамгаалах эрх бүхий байгууллага юм. Иймд ЭХЯ, ЭХЗХ, ТЗЭ байгууллага, холбогдох төрийн болон орон нутгийн байгууллагууд 2017-2018 оны халаалтын улиралд  өвлийг өнтэй давах эрхэм үүрэг хариуцлагыг биелүүлж ажиллах зайлшгүй шаардлагатай байна. Зөвлөгөөний үеэр Улаанбаатар хотын дулаан хангамжийн өнөөгийн байдал, горим ажиллагаа, шугам сүлжээний байдал, цаашид хэрэгжүүлэх арга хэмжээ, тулгамдаад буй асуудлын талаар ярилцаж, нэгнийхээ ажлыг ойлгож, дэмжсэн, хууль эрх зүй, тусгай зөвшөөрлийн нөхцөл, шаардлага, гэрээгээр хүлээсэн үүргээ биелүүлж, Улаанбаатар хотын хэрэглэгчдийг ая тухтай амьдрах нөхцөлөөр хангаж ажиллана гэдэгт итгэлтэй байна” хэмээн онцолсон юм. 



  Зөвлөгөөний үеэр "Улаанбаатар дулааны сүлжээ” ТӨХК-ийн захирал Д.Бямба-Очир Нийслэлийн төвлөрсөн дулаан хангамжийн өнөөгийн байдал, дулаан түгээх хангах үйл ажиллагаанд тулгарч буй хүндрэлүүдийн талаар зөвлөлгөөнд оролцогчдод мэдээлэл хүргэлээ. Мөн Эрчим хүчний зохицуулах хорооны Тусгай зөвшөөрлийн хэлтсийн дарга Ч.Жаргалмаа "Эрчим хүчний тусгай зөвшөөрлийн зохицуулалт, дулаан түгээх хангах үйл ажиллагаа, цаашид авах арга хэмжээ” сэдвээр илтгэл тавьлаа. Эрчим хүчний зохицуулах хорооны Үнэ тарифын хэлтсийн дарга Б.Болор-Эрдэнэ, Хэрэглэгч орон нутгийн хэлтсийн дарга Д.Бат-Эрдэнэ, Хяналт шалгалтын хэлтсийн дарга Э.Самдан нар дулаан хангамжийн асуудлыг сайжруулах, үнэ тариф болон хяналт шалгалт, хэрэглэгчдийн ая тухтай байдлыг хангах чиглэлээр илтгэл тавьж хэлэлцүүлсэн юм. Мөн Улаанбаатар хотын  дулаан дамжуулах, түгээх сүлжээнд хийгдэж буй техник, технологийн шинэчлэлтийн талаар "Улаанбаатар дулааны сүлжээ” ТӨХК-ийн Ерөнхий инженер Б.Батбаяр танилцууллаа. 



  Энэхүү зөвлөгөөний үеэр Улаанбаатар хотын хэрэглэгчдийг чанарын шаардлага хангасан дулааны эрчим хүчээр хангах талаар ярилцаж, зөвлөмж гаргах юм. Зөвлөмжид тусгай зөвшөөрөл эзэмшигчид холбогдох хууль, дүрэм, журам, тусгай зөвшөөрлийн нөхцөл шаардлагын хүрээнд үйл ажиллагаагаа явуулах, тулгамдаж буй хүндрэлтэй асуудлыг хэрхэн шийдвэрлэх, цаашид авах арга хэмжээний талаарх асуудлыг тусгаж өгөх юм байна.