Хуучин оноо үдэж, шинэ оноо угтах торгон агшинд Монголын барилгын салбарынхан нэгэн дээвэр дор хамтдаа шинэ жилийн баяраа тэмдэглэн өнгөрүүллээ. Барилгын шилдэг байгууллагуудыг эгнээндээ нэгтгэсэн Монголын барилгын үндэсний ассоциациас санаачлан "Барилга Эм Эн" ХХК-тай хамтран, Барилга, хот байгуулалтын яам болон төрийн бус мэргэжлийн байгууллагынхны дэмжлэгтэйгээр “Барилгын салбарын нэгдсэн шинэ жилийн цэнгүүн 2018” баярыг “One Event Hall” хүлээн авалтын танхимд зохион байгуулсан юм.

  Хуран цугласан барилга, бүтээн байгуулалтын салбарынхан өнгөрсөн жилийнхээ амжилт, алдаа дутагдлыг дүгнэн, ирж буй шинэ оноо эдийн засгийн орчин сайжирч буй сайхан мэдээгээр угтаж, ийнхүү баяраа тэмдэглэлээ. Тэд өнгөрсөн ондоо салбараа манлайлан, амжилттай ажилласан 12 байгууллага, хувь хүнийг шалгаруулан, цаашид их бүтээн байгуулалтыг эх орондоо бүтээхийг бэлгэдэн “Их барилга 2017” шагналыг гардуулсан юм.


  Баярын цэнгүүнд хүрэлцэн ирсэн хүн бүр ирэх 2018 оныг өөдрөгөөр төсөөлсөн, хөрөнгө оруулалт нэмэгдэж буй тухай олон таатай үг хэлж байсныг энд онцолъё.

  УИХ-ын гишүүн, БХБ-ын Сайд Х.Баделхан: Барилгын салбартаа өөрийн хувь нэмрийг оруулж яваа эрхэм  хүндэт барилгачид та бүхэндээ ирж буй шинэ оны халуун мэндчилгээг өргөн дэвшүүлье. 2017 он бидний хувьд хүндхэн, эдийн засгийн хямралтай жил байсан. Гэхдээ Олон улсын валютын сангийн дэмжлэгтэйгээр бид хямралаас гарах сууриа тавьж, эдийн засаг сэргэж, гадаадын өр зээлүүдээ төлөх боломж бүрдлээ. Мөн манай барилгын салбарт томоохон төсөл хөтөлбөрүүд хэрэгжиж эхэлж байна. Хамгийн гол нь БНХАУ-ын хоёр тэрбум юанийн буцалтгүй тусламжаар хэрэгцээтэй байгаа төслүүдээ хэрэгжүүлэх гэж байна.

  Улаанбаатар хотын агаарын бохирдолтой холбоотой хамгийн том асуудал болох Төв цэвэрлэх байгууламжийг мөн Хятадын засгийн газрын хөнгөлөлттэй зээлээр, аймаг болон хотуудын цэвэрлэх байгууламжийг Азийн хөгжлийн банкны санхүүжилт, Польшийн засгийн газрын тусламжийн хүрээнд шийдэхээр боллоо. Иргэдийн хамгийн их хүсэн хүлээж буй ипотекийн зээлийн эх үүсвэрийг нэмэгдүүлэх гэх мэт гол асуудлуудыг шийдэхээр ажиллаж байна. Энэ бүх ажлыг манай барилгачид та бүхэн хэрэгжүүлэх болно гэдэгт итгэлтэй байна. Хэдийгээр эдийн засгийн байдал хямралтай байгаа ч эгнээндээ 90 гаруй мянган хүнийг нэгтгэсэн манай барилгын салбар эдийн засгийг тэргүүлж эхэллээ. Ингээд та бүхэндээ шинэ оны мэнд хүргэж, эрүүл энх сайн сайхан байхын ерөөлийг дэвшүүлье.


  МБҮА-ийн Ерөнхийлөгч Д.Цэрэнжигмэд: Эрхэм хүндэт ноёд, хатагтай, нийт бүтээн байгуулагч та бүхэндээ шинэ жилийн баярын мэндийг Монголын барилгын үндэсний ассоциацийн хамт олны өмнөөс дэвшүүлье. Манай ассоциациас санаачлан, БХБЯ болон төрийн бус мэргэжлийн байгууллагуудынхаа дэмжлэгээр өнөөдрийн энэ сайхан арга хэмжээг зохион байгуулж байна. Хүрэлцэн ирсэн та бүхэндээ баярлалаа. Өнгөрч буй 2017 он урьд жилүүдийнхтэй адил барилгын салбарт олон сайхан бүтээн байгуулалтуудыг хийсэн жил байлаа. Ирж буй 2018 онд та бүхний хийж бүтээхээр зорьсон бүх ажил үйлс бүтэмжтэй, азтай хийморьтой байхын өлзийтэй сайхан ерөөлийг дэвшүүлье.


  МҮХАҮТ-ын Ерөнхийлөгч Б.Лхагважав: 2012-2017 он гээд хүндхэн жилүүд үргэлжиллээ. Үүнд барилгын салбар хамгийн их өртсөн нь. Яахав 2017 оны хувьд эдийн засгийн сэргэлтүүд ажиглагдаж эхэллээ. Гэхдээ олон жил үргэлжилсэн энэ хүндхэн байдлаас барилгын салбар нэг том олзтой гарч ирсэн гэж боддог. Компаниуд маань зөвхөн барилга барихаас гадна санхүүжилт, худалдан борлуулалт, үйлдвэрлэлийн асуудлыг нэлээд шинжлэх ухааны үндэслэлтэйгээр технологийн дагуу гүйцэтгэх менежментэд суралцсан жил байлаа. Барилгын материалын хэд хэдэн том үйлдвэр баригдаж, гол түүхий эд материалаа өөрсдөө хийдэг болсон нь ирээдүй хүрэх амжилтынхаа суурийг тавьж байгаа юм. Юутай ч 2018 онд эдийн засгийн 5.8 хувийн өсөлтөө хадгалж үлдэх хэрэгтэй. Зам, барилга барьчихсан хөрөнгө оруулалт, санхүүжилтээ буцааж төлж байгаа учраас зөвхөн барилга гэлтгүй бүх салбар хичээх хэрэгтэй болж байна. 2018-2019 он бол томоохон зээл, хөрөнгө оруулалтуудыг буцааж төлөх хариуцлагатай үе юм. Харин дараа нь 2019 оноос эдийн засаг, зах зээлийн хувьд таатай орчин бүрдэнэ гэж үзэж байна.


  МБИХ-ны Ерөнхийлөгч Б.Мөнхбаяр: 2017 он маань амжилт бүтээлээр дүүрэн он жил болж өнгөрч байна. Бидний хувьд олон улсын хэмжээний Азийн барилгын инженерүүдийн зохицуулах зөвлөлийн хорооны хурлыг БХБ-ын Сайдын ивээл дор өөрийн эх оронд амжилттай зохион байгууллаа. Дөрвөөс таван жилийн өмнө эдийн засагчид 2018 оныг эдийн засгийн өсөлт идэвхтэй жил болно хэмээн таамаглаж байсан. Эдийн засаг сайжирвал барилгын салбар ч дагаад сэргэх учир бидний хувьд олон ахиц дэвшил гарч, барилгачид маань ажил ихтэй, нэлээд завгүй байх болов уу.


  Монголын барилгын гүйцэтгэгч байгууллагуудын холбооны  Ерөнхийлөгч Ц.Эрдэнэбат: 2017 он маш онцлогтой жил байлаа. Үндэсний бүтээн байгуулалтын корпораци маань шинэ нисэх онгоцны буудлын барилгын ажил тэргүүтэй үндэсний томоохон объектууд мөн орон сууцны хэд хэдэн барилгыг ашиглалтад хүлээлгэн өгч, багагүй ажил амжуулсан үр бүтээлтэй жил өнгөрч байна. Харин ирэх онд бид өөрсдийн санаачилсан "Сервис центр" төслийг үргэлжлүүлэн бүтээн байгуулалтад гар бие оролцох болно. Ер нь 2018 он бол их бүтээн байгуулалтын жил өрнөнө гэсэн өөдрөг бодолтой байгаа. Миний бие барилгын салбарт 35 жил ажиллахдаа 6900 орон сууцны барилгын ажлыг удирдан зохион байгуулж бариулсан байна. Сургууль, цэцэрлэг гээд иргэний 50 шахам барилга, 4 том үйлдвэрийн барилгыг барьжээ. Энэ ажлын маань амжилтыг төр засаг маань үнэлээд “Гавьяат барилгачин” хүртээсэн сайхан жил өнгөрч байна.


  Монголын архитекторуудын эвлэлийн Ерөнхийлөгч Э.Хүрэлбаатар: Энэ онд бидний хувьд архитекторуудын түүхэнд тэмдэглэгдэхүйц олон үйл явдал боллоо. Тухайлбал, 2017 оны нэгдүгээр сарын нэгнээс төрийн зарим чиг үүргийг гүйцэтгэх онцгой үүргийг хүлээж, архитекторуудын мэргэшсэн зэрэг олгох давтан сургалтыг зохион байгуулна. Олон улсын стандартын дагуу хөтөлбөрийг нь боловсруулж, үүнийхээ дагуу сургалтаа явуулж байна. Мөн архитектур, хот төлөвлөлтийн мэргэжлийн зөвлөлийг ажиллуулахаар болсон. 2017 онд 10 мянга гаруй архитекторыг хамарсан Дэлхийн архитекторуудын хуралд оролцсон.

  2006 онд түүхэн дурсгалт барилгыг сэргээн босгох чиглэлээр томоохон арга хэмжээ авах шаардлагатай болсон гэж үзээд БСШУЯ-тай хамтран анхдугаар зөвлөгөөнийг хийсэн. Энэ зөвлөгөөний дүнд сэргээн босгох чиглэлд үйл ажиллагаа явуулж буй байгууллагуудыг чадваржуулахад анхаарч, дурсгалт барилгыг бүртгэх ажлыг зохион байгуулж байна. Үүн дээр Японы Нара хотод төвтэй Азийн түүхэн дурсгалт барилгыг сэргээн босгох санд гишүүнээр элссэн. Тиймээс 2018 оноос эхлэн энэхүү сангаар дамжуулан Монгол улс тодорхой дурсгалт барилгаа сэргээн босгох санхүүжилттэй болж байгаа. 

  Энэ бол их чухал асуудал. Монголын архитекторуудын бүтцийн дэргэд Залуу архитекторуудын зөвлөл байдаг. Зөвлөл маань өөрсдөө төлөвлөгөөгөө гарган, ажлаа хийж хэрэгжүүлдэг. Энэ жилийн гол ажил бол залуу архитекторуудаа чадавхжуулах, тэдний мэргэжлийн түвшинг сайжруулахад чиглэн уралдаан тэмцээн зохион байгуулсан. Мөн тэдэнд зориулж бакалаврын дараах сургалтыг бий болгосон. Уг сургалтад хамрагдсанаар тусгай зөвшөөрөл шаардагдахгүй барилгын зураг төслийг хийх, автор нь болох эрхтэй болж байгаа. Оюутан төгсөөд 5 жилийн хугацаанд мэргэшсэн зэрэг эзэмших ёстой. Энэ хоорондох хугацааг зохицуулж, мэргэжлийн зэрэг эзэмшүүлж буй үр дүнтэй ажил болж байгаа юм.

  Ийнхүү шинэ оноо угтан баяраа тэмдэглэсэн барилгын салбарынхнаас “Их барилга 2017”  шагналын эздээр тодорсон шилдэг бүтээн байгуулагчдын мэдээллийг ЭНД дарж үзнэ үү.