Хувь хүний орлогын албан татвар дөрвөн шатлалтай болж нэмэгдлээ
Олон Улсын Валютын Сангийн хөтөлбөрийн хүрээнд долоон төрлийн татвар нэмэхээр болсны гурав нь 2017 онд хэрэгжиж эхэлсэн бол дөрөв нь 2018 оны нэгдүгээр сарын нэгний өдрөөс хүчин төгөлдөр болж байна. Үүнд, хувь хүний орлогын албан татварыг дөрвөн шатлалтай болгож нэмэгдүүллээ. Ингэснээр иргэд 1.5 сая төгрөгийн орлогод 10 хувь, 1.5-2.5 сая төгрөгт 15 хувь, 2.5-3.5 сая төгрөгт 20 хувь, 3.5 сая төгрөгөөс дээш орлогод 25 хувийн татвар төлөх юм. Ийнхүү хувь хүний орлогын албан татварыг шатлалтай болгосноор улсын төсвийн орлого 2018 онд 88 тэрбум төгрөг, 2019 онд 84 тэрбум төгрөгөөр нэмэгдэнэ гэж Сангийн яам тооцоолжээ. Хувь хүний орлогын албан татварыг шатлалтайгаар нэмж байгааг уул уурхайн салбарынхан хүчтэй эсэргүүцэж байгаа юм. Үүнтэй холбоотойгоор "Олон Улсын Валютын Сангийн хөтөлбөрийн хүрээнд хүлээсэн үүргээ зөрчихгүйгээр уян хатан зохицуулалт хийж болно" гэж МҮХАҮТ үзэж байна. Үүнээс гадна хувь хүний орлогын албан татварын хөнгөлөлтийг хөдөлмөрийн хөлсний доод хэмжээтэй уялдуулан үе шаттайгаар нэмжээ. Ажил олгогчдод хамааралтай нэг өөрчлөлт бол нийгмийн даатгалын шимтгэл бөгөөд өмнө нь ажилтан, ажил олгогч 10 хувийг тус тус төлдөг байсан бол энэ сарын нэгнээс эхлэн тус бүр нэг хувиар нэмэгдэж, 11 хувь болж байна. Мөн нийгмийн даатгалын шимтгэлийг 2019 онд 0.5 хувь, 2020 онд нэг хувиар тус тус нэмнэ.
Түүнчлэн ашигт малтмалын салбарт хамааралтай өөрчлөлт орж байна. Тухайлбал, нэгдүгээр сарын нэгнээс эхлэн ашигт малтмалын лицензийг гуравдагч этгээдэд зарсан тохиолдолд хамгийн том хувь эзэмшигч нь 30 хувийн татвар төлнө. 2018 оны Төсвийн тухай хуулийг дагалдаж орсон энэхүү өөрчлөлтөөр улсын төсөвт энэ онд 36 тэрбум төгрөгийн орлого төвлөрүүлэхээр төлөвлөжээ.