Лондонгийн гудамжнаа хаягдал хуванцар савыг дахин ашиглаж, 3D интерьерийн шийдлийг харуулж чадсан өвөрмөц бүтээн байгуулалтыг хийж байна. Krause Architects болон Ai Build компаниудын хамтран хэрэгжүүлж буй Bottletop дэлгүүрийн төсөлд Энэтхэгийн Дели хотын гудамжуудаас цуглуулсан хуванцар савнуудыг хэвэнд оруулж, ашиглаж байгаа нь нэлээд өвөрмөц бүтээл болжээ.

  Энэ нь нийгмийн хариуцлагаа биелүүлж буйн нэгээхэн жишээ бөгөөд зарим ажлыг Нидерландад төвтэй ReFlow компаниар гүйцэтгүүлсэн нь орон нутгийн үйлдвэрлэгчдэд хөрөнгө оруулалт хийж дэмжлэг үзүүлсэн бас нэгэн давуу тал болжээ.



  “Дэлхий даяар өдөрт хоёрхон доллараас бага орлоготой ажилладаг хуванцар сав цуглуулагч 40 сая хүний амьжиргааг дээшлүүлж, 3D хэвлэх технологийг хөгжүүлэх нь бидний гол зорилго юм” хэмээн ReFlow компанийнхан өгүүлсэн байна.



  “Zaha Hadid архитектурын компанийн ахлах ажилтан Паоло Зиллигийн дэмжлэгтэйгээр хийгдэж буй энэхүү Bottletop дэлгүүрийн төсөл нь экосистемд эерэг нөлөөтэй, хэмнэлттэй, технологийн дэвшлийг шингээсэн мөртлөө загварын хувьд тансаг дээд зэрэглэлийн шийдлийг тусгаж чадсанаараа ихээхэн онцлогтой” гэж гүйцэтгэгч компани дүгнэжээ.