BARILGA EXPO 2018 олон улсын үзэсгэлэнгийн “Орон сууц, ногоон барилга” хэсэг болж байгаа билээ. Энэ өдөр “Жорлонгийн технологийн шийдлүүд” сэдвээр “Нутгийн шийдэл сан” ТББ-ын тэргүүн Ц.Оюунгэрэл, “Жорлон ба бизнес” - “Нутгийн шийдэл сан” ТББ-ын УЗ-ын гишүүн Ц.Оюундарь, Амины орон сууц барих зөвлөмж - “Барилгачин групп” ХХК, Улаанбаатар хотын орон сууцны зах зээлийн судалгаа - “Тэнхлэг зууч” ХХК-ийн Гүйцэтгэх захирал Д.Должинсүрэн тус тус илтгэл тавьж, олон нийтэд зөвлөгөө, мэдээлэл өглөө.

       Нутгийн шийдэл сан “Цэвэрч Монгол” төслийнхөө хүрээнд “Жорлонгоо өөрчилье” ном эрхлэн гаргаж, уг номонд орсон байгаль орчинд сөрөг нөлөөгүй, хөрсний бохирдлыг бууруулах эко жорлон барьж байгуулах технологийн шийдлүүд, эрүүл мэнд, байгаль орчин, санхүү хөрөнгө оруулалт, иргэдийн оролцоо зэрэг өргөн сэдвийг хамарсан сургалтыг ОРОН ДАЯАР зохион байгуулж байгаа. Тэд ариун цэврийн байгууламжийг барьдаг ашгийн байгууллага бус, манай оронд тохирох боломжит шийдлүүдийг танилцуулахын зэрэгцээ бусдад энэ төрлийн бизнес хийх санаа, сэдэл, хөрөнгө оруулалт олох арга зам, энэ төрлийн компаниудад туслах олон улсын сүлжээ зэргийг танилцуулан, мэдээлэл, зөвлөгөө өгч байгаа сайн дурын байгууллага гэдгийг онцлон тэмдэглэмээр байна.



        “Нутгийн шийдэл сан” ТББ-ын тэргүүн Ц.Оюунгэрэл илтгэлийнхээ эхэнд, “Жорлон” гэдэг бол ичих, нууж хаах асуудал огтхон ч биш. Энэ бол үндэсний аюулгүй байдлын хэмжээнд яригдах маш чухал асуудал хэмээн онцлоод илтгэлээ эхлүүлсэн юм. Тэрээр мушгиа шахагчтай хуурай, үртэс руу унагааж хутгадаг, төмөр савтай хуурайшуулагч, энгийн ширэгэн, бие бордоо нийлүүлэгч гэх зэрэг олон төрлийн жорлонгийн шийдлүүдийг хийц, бүтээх талаас нь танилцуулсан. Мөн илтгэгч Ц.Оюундарь жоронг барих болон өтгөн лагаар бизнес хийх тухай ярьж байлаа. Энд онцлоход, зөвхөн хот, тосгоны боловсон бие засах оо-ын тухай яригдаагүй, хөдөө талд хийх боломжтой жорлонгийн шийдлийг танилцуулсан. Уг шийдлийг доорх зургаас хараарай.



Төслийн хүрээнд одоогийн байдлаар нийслэлийн 9 дүүрэг, 20 аймагт нийт 36 удаагийн бүрэн хэмжээний сургалт явуулан 2600 хүнийг хамруулж, 5 удаагийн товчилсон лекцийг 300 хүнд хийсэн. Сургалтад хамрагдаж сургагч багшийн гэрчилгээ гардсан иргэд орон нутагтаа сургалт хийж хөрсний бохирдлыг бууруулах ажилд иргэдийн оролцоог нэмэгдүүлэхээр ажиллаж байна.

 “Нутгийн шийдэл сан” ТББ-ын УЗ-ын гишүүн Ц.Оюундарь
 

       
       Дараагийн илтгэл буюу “Мөрөөдлийн байшингаа барих уу” гарчигт амины орон сууц барих 10 зөвлөмжийг Барилгачин групп ХХК-ийн Барилгын инженер дээрхтэй мөн ижил бодит хөрсөнд буулгах байдлаас нь хийц, бүтээц талаас тайлбар, зөвлөмж олгосон юм.
 

       Зөвлөмжөөс онцлоход, Тухайн сууц нь баригдах газар, байгаль цаг уур, хөрсний бүтэц зэргээс хамаарч барилгын хийц бүтээц ялгаатай байх ба түүнээс хамааран барилгын төсөв харилцан адилгүй гардаг. Өөрөөр хэлбэл нэг барилга хоёр өөр байршилд адил өртгөөр баригдах нь тун ховор учир бусдыг бүү дуурайгаарай.

     Харин Улаанбаатар хотын орон сууцны зах зээлийн хамгийн сүүлийн үеийн буюу 2018 оны 3 дугаар сард хийгдсэн судалгаанаас товчилбол, Улаанбаатар хотын хэмжээнд байгаа нийт өрхийг сууцны төрлөөр ангилж үзвэл инженерийн дэд бүтэц бүхий нийтийн орон сууцанд 163,126 өрх, гэр хорооллын хашаа байшинд 109,543 өрх, гэр хороололд монгол гэрт 104,211 өрх, тусдаа тохилог сууц болох Амины орон сууцанд 3,664 өрх амьдарч байна. Харин Улаанбаатар хотод орон гэргүй 284 өрх 2017 оны байдлаар бүртгэгджээ.

Шинэ орон сууцны тухайд, 55,914 айлын нийтийн болон амины орон сууцны 414 төсөл хэрэгжиж байна. Энэ мэт захиалга авч байгаад барилгын ажил түр зогссон төсөл, дүүрэг бүрийн орон сууцны дундаж үнэ, хаус, тауны үнэ гэх мэт сонирхолтой тоо баримтыг танилцуулсан юм.
 

 "Тэнхлэг зууч” ХХК-ийн Гүйцэтгэх захирал Д.Должинсүрэн
 

         BARILGA EXPO 2018 ОУ-ын үзэсгэлэн маргааш 17:00 цаг хүртэл үргэлжилнэ. Үзэсгэлэнгийн үеэр тогтмол сугалаа, тэмцээн зохион байгуулагдаж байгаа, уншигч та бүхнийг үзэсгэлэн дуусахаас өмнө амжиж хүрэлцэн ирэхийг урьж байна.
 

Үзэсгэлэнгийн талаарх дэлгэрэнгүй мэдээллийг barilgaexpo.mn сайтаас аваарай.